الشمال نيوز – عامر الشعار

إلى الغالي رفيق الدرب سايمون مارون حرب
بمناسبة عيد ميلاده
أقدم حروفي وتمنياتي
تحياتي ومودتي .
إذا هديتَك من عمري عمر، ومن روحي غمْر،
ما بوفّيك حبَّك الكبير
عا قلبي.
يا أمير الزمان
اللي بيلوّن إيّامي وأحلامي بالضحكه والحنان.
لولاك ما كان للحياة
عطر الورد، وتياب الربيع.
لولاك ما كان
في حرف بينكتَب،
ولا سطور من نور،
ولا أغاني طيور.
لولاك كانت العتمه
عا الشبابيك،
والشارع غريب.
كانت الضحكه ما بتحكي. وكان القمر تخبّا ورا الغيم واسودّت الإيّام.

عيد ميلادَك يا حبيبي
عيد الزمان اللي راح
وبعدو غنّيه بالقلب،
وعيد الحب اللي جايي
وأفراح بتغمر أفراح.

إسمك مكتوب
عا جبيني شمس،
وعا شفافي نغمه،
وعالياسمين العالي،
لأنّك بقلبي
يا رفيق عمري
الرب يعطيك العمر الطويل وتضلّ السعاده بعيونك.
لآخر الحياة،
وبعد الحياة.
متل ما إنت
بعيوني وبقلبي للخلود.

كل عيد وإنت بخير
بيرتلها الطير
وبيغنيها الشجر والوتر
مع الأحبّه الغاليين،
وتعيش يا حبيبي
الأغلى من الغالي،
يا حلو على بالي
عا طول السنين.
هابي بيرثداي سايمون

كلود ناصيف حرب ⚘

Happy_Birthday ?

Simon Marroun Harb