هيدا الشتي

الشمال نيوز – عامر الشعار

#كلود_ناصيف_حرب
*هيدا الشتي*
صباح الاشواق والحلا…
والحنين قد البحر

واتتظاري الك اول كلمه
وآخر كلمه بكتاب الصلا .

هيدا الشتي مش دموع…
موسيقى وغنيه…

وعم يكتب عالشجر والبيوت
اسمك انت.

بتتغير الدني
والشجر بيخاف من الريح…
واللي ما بيتغير نحنا…

الشتي ما بيجرحنا
لانو الخلود مطارحنا.

إذا سالوني عن الحلو
شو بقول؟
ييييه… بتخبّا…
هوي مرسوم بعيوني…
بكلامي…
وبيمشي قدامي…
قديش بحبو انا؟
قد السما والشمس والافكار

ولو غاب عني نهار
بيغيب فرح الدار…
وهيك بحبو.

عا طول خلف البردايه
تا تشوف عيوني
انا وعالمرايه…

هيك بتلحقني؟
وامي ما بتصدقني…

سألتني: مين هيدا؟
قلتلها قمر وقع من السما
وعا غفله صار كبير…
متل ابن الحكايه.

شو بيقولو هالعيون؟
اسرار اسرار…
وحكايات قمر الدار
وبيقولو انت حبيبي

لعيونك انا…
ومن عيونك الاشعار.

نظره من عيون متل الحرامي…
غمره فيها شوق وحنين…

بوسه عالخد متل طباعة حروف…

كل شي بينتهي متل الوقت
وقصتنا ما بتنتهي…
عنوانها انا وانت…
والخلود.

كل غمر ورد بقطفو
من جنينة قلبي…
عا بابك بالليل مطرحو…

وما بتعرف مين انا؟
انا الفرح

كل ما قطفت ورده…
من قلبي.

لو كان عندي عتب كبير
قلبي ما بيتغير…

انا وانت الوجود…
وقلبي وقلبك خلود.

اجمل شي بالربيع هوي انت…
واحلى شي بالعطر همساتك.

من وقت اللي غابو
الضحكه صارت وجع…

والليل شتي ما بيخلص
دمعه ورا دمعه…

كأنو السما تركوها ولادها
وما بدهن يرجعو…

يا ايام خلي الضحكه بعيون حبيبي…

من وقت ما زعلنا
صار هوي غريب عن حالو
وانا عن حالي غريبه.

شو بتقول هالمعزوفه؟
بتقول: احلى موسيقى عيونك…
واغلى صباح
صباح حنيني الك.

أنا افروديت الحلم والاسطورة
انا ملكة قصرك العالي…

وباللون الاحمر العا شفافي بكتبلك:

ناطرتك عا براج الكلمه…
بين السطور اللي بتضوي…
فوق النجمه…

وانت حبي وسنيني
وامير حنيني.
وهيك… بحبك.

وردة روحي لروحك…
يا ساكن بقلبي وروحي

وعطر الورده أنا
بربيع إيامك ولياليك…

وكلما شفتك
نظره من عيوني بتقلك:
هيك بحبّ عيونك…
وبحب إتلاقى فيك…

كنت اعرف انو الحب
ما الو لون…

وبس شفت لون عيونك
صار الحب الوان…

والصبح ما كان الو صوت
قبل ما اسمع همسة حنينك…

والغابه اللي حد النهر
ما كان فيها شعور…

وهلق كل شجره…
كل نسمه…

وكل نقلة عصفور
عا غصن اخضر

هني سيمفونية حضورك بقلبي…
وهيك بحبك.

عطاني حبيبي ورده…
خبيتها بتيابي…
وسالوني عنها صحابي
قلتلهن: وردة حبيبي
وعطر ذكرياتي…

وكيف ما بحبو انا…
وهوي قمر حياتي؟

جمال الإيّام
نظره من عيون مشتاقين…
وجمال الأحلام إنّك فيها
يا بو العيون حلوين…

وأنا رح ابعتلك حلم من عندي
تا تسمع صوتي…
وضحكتي…

وعا فكره
يخليلي قمر ضحكتك
يا قمر الحنين.

متل هدوء عيونك شجر
عا مد النظر…

ونهر غميق كتير
وانا وانت عالمرايه
صورة اميره وامير…

والسما الزرقا
كتبت عالورقه:
هيك انا بحبك.

صرت اعرف
انو النور
من لون ضحكتك

وهالسما اللي متل الخيمه
بتوشوش ويتقول:
اذا ما كان الحب غنية

بصوت ملاك
بيكون شعور ما الو معنى…
وهيك انا بحبك

بفرح الشمس
وسفر الغيم الأبيض…

ونغمة ملاك…
وانت وحدك وحدك
ملاك عمري.

كل ورده ما بتكون انت
ما بزرعها بحديقة عيوني.

لبستْ لون البحر
قد ما عندي اسرار…
والسر الكبير انت.

صورة حنين باللون الازرق
والحب اللي بيخلق
مع كل فجر بيخلق…
ولا يوم بيعتق.

كم مكتوب بعتلك؟
يمكن مرسال الهوى
ضيع العنوان..

يمكن انبحّت قيثارة الحنين…
وناطره أنا تا يفتّح الياسمين

وترجع تقللي
إنّك اشتقتلي
وما بتنساني عا طول السنين.

وردة حمرا غيرت حياتي
حبيتك كتير
وراضيتك كتير…

لأنك الأول والأخير…

ما بتفرق معي شو صار
المهم اني كنت معك
ولو كنت عنّي بعيد
وأنا ما بترك رسايلك الحلوين

وبكل عيد
بفلفش بوراق منسيه
خبيتهن بقلب المزهريه
وبرجع للإيام والذكريات…

وبقشع صورتك بين السطور
وبسمع صوتك
عم بيقول إسمي…
وعم يسأل عليّي.

مع طير الاشواق
بيسلم عليك
قلبي المشتاق.
#كلود_ناصيف_حرب ⚘