خواطر مغترب وأبقاش بدها قوموا تَنْهني…
الشمال نيوز – عامر الشعار
أبقاش بدها قوموا تَنْهني…
بس يا واش يا واش لسه ما صار شي تألفت الحكومة و وزرائها كلهم بحالة التمني
ولا واحد منهم قدر يوعدنا بأنه جايب خطة تنقذنا، لأنه القرار مش بايده و لسه ما صدرت الأوامر و اليوم بس لاستقبال الناس اللي جايي تهني
و ما بعرف شو صار بعقول هالناس و على شو عم يحتفلوا رصاص بالهواء و ناس عم تطبل و تزمر و تغني
و ماكرون و المجتمع الدولي و كل الناس و لشهور طويلة أصروا على حكومة أخصائيين و مختصين
و حصلوا اليوم على وزراء من الأحزاب مقربين
و بالنسبة للإختصاص ما في غير أربعة أو خمسة على هذا الأساس، دكتور فراس الوجه الأبيض و بو حبيب السفير و القرداحي اللي أخذ الإعلام و ترك الوسط الفني
والظاهر الحال باقي على حاله و الكل أخذ حصته و دبّر حاله
و لشو العجلة لتجتمع الحكومة؟ أعطوهم أربعة أيام لكل واحد يحلق و ينتف حواجبه و للصورة يحضّر حاله
والناس بالطوابير مستمرة على البنزين والمازوت و الخبز و الدولار بالسوق الحرة
و الحكومة ما منعرف من وين بدها تبلش من الإصلاحات بالداخل و ردّ الأموال المنهوبة و ترشيق و تخفيض عديد الموظفين أو الذهاب للشحادة و التسول من بره
كما وعد الميقاتي بالذهاب إلى كل الدول العربية لطلب المساعدة مع انو هو عارف ما حدا حيعطيه قرش قبل الإصلاحات و صاروا قايليلنا اياها شي ألف مرة
و ما بعرف هل هني ما عم يستوعبوا إنو في شروط موضوعة لحتى يقبل حدا يساعدنا و شروطهم كثير مشروعة
و لو بديتم بالإصلاحات من الأول و سكرتوا مزاريب الهدر و وقفتوا عن المودعين حالات الغدر من قِبل البنوك و أصحابها اللي هرّبوا الأموال للخارج و أوقفتم كل حالات السرقة و الإحتكار و الجنون المفتعل لسعر الدولار و أوقفتم التهريب اللي استنزف مقدرات البلد لرجع البلد مِشي بطاقته الذاتية
و نكرر نحن لسنا شحاذين و لسنا بحاجة التسول إذا ضُبطت كل منافذ السرقات و لا نقول الهدر، انها السرقة الممنهجة التي تحصل من قِبَل الطبقة الحاكمة و التي أوصلت لبنان الناجح و المحسود من كل جيرانه و أوصلته للحضيض الذي نحن فيه
و الكل يدعي العفة
و العفة من أسهل الأمور التي يمكن إثباتها بتدقيق بسيط عن تاريخ الثروات المستحدثة
و مَن كان عفيفاً فليُعطى ميدالية العفة و تنتهي المأساة
و أخيراً، نكرر ما طالبنا به مراراً بأننا لا نريد حكومة قبل أن تقدم برنامج عمل واضح لإصلاح الخلل و إنقاذ البلد، و يكون الوزير مُلزم بتنفيذ الإصلاح بوزارته بوقت محدد تحت طائلة المحاسبة و إجباره على الإستقالة و إذا لم يفعل فيُسجن إذا لم يستقيل و يُستبدل بآخر بنفس الشروط.
و لن تستقيم الأمور إلا بهكذا ترتيب، و نتمنى على الرئيس ميقاتي أن يقدم البرنامج و ليس بياناً وزارياً و إلا عاطفتك و دمعك سيذهب سدى و السلام…
ملاحظة:
خزينتنا مليانة بخاويش و بتزرب متل السلة روحوا سكروا هالبخاويش قبل ما ترجعوا تحطوا فيها الغلة
