يوم أحببتك، كانت قرب الباب ياسمينة

الشمال نيوز – عامر الشعار

#كلود_ناصيف_حرب
*حنين*
يوم أحببتك،
كانت قرب الباب ياسمينة.

أرسلت إلى شالي
نسمة عطر .
ولفظت حروف إسمك فكانت: ( ح ن ي ن.)
***

شو اللي بيخليني
اتطلع بها الصورة،
وقلها لا تغيبي
من قدامي؟
حبيبي متل السهم
الراجع بيمرق بأحلامي.
***
ما تلاقينا بالخيمه
اللي فوق الغيمه.
ما عطاني شال تا حطو عا شعري اللي طاير بالريح.
وكحل عيوني ما تغير ،
وكحل العشاق
بيصير شتي ودموع.
***
بحبو متل الورده البرية، متل الغنيّه.
ويا صوره
لا تروحي من قبالي .
تا اغمر حبيبي الغالي.
وبتبقي إنتي معي …
ذكرياتي وموالي…
ورح حطك بقلبي وإزرعك بجنينة تحت القمر العالي.
***
طريقي صوب الشمس .
هيك الكلمة أول الحكايه.
والحكاية قدر
بيتمرد عالليل وعالسكوت.
ما بخاف من شي أبدا
إلا من الوقت.
ولو الوقت سبقنا.
بتبقى ورده عا المفرق.
بتحكي عنا وبتقول
كنا هون وحلوه مطارحنا.
والعاصفة ما بتجرحنا.
***
*كمشة حروف*
من كم سنه جمعتلك
كمشة حروف من قلبي
من برد الشتي حميتهم
وحطيتهم بعيوني
وخبيتهم من الريح المجنونه…وبعتم الليل
صارو قناديل السهر
لما غاب عنا القمر
بهديك حروفي
من هلق تا يخلص العمر
وهني بيروحو لعندك
اذا ما قدرت زورك…
لا تحبسهم بالعلبه…
هودي الحروف هني حكايتي معك
وحكاية حبي.
***
هيدي البنت عم بتخلص الورده من الشتي.
قولك الورده
بتستاهل نغرق كرمالها؟
الورده …
اذا ماتت بتموت الغنية.
وما بيعود في لون
لشفاف الصبيه.
***
هيدا كلام أو حنين البلابل؟
بكرا بيروح الشتي
وبيرجع الصيف.
والمقاعد ناطرين
تنين مشتاقين.قديش رح يحكو العيون ويصير السكوت موسيقى؟
وإذا تطلعت فيك
رح ضل أنا
أو رح صير إنت
وتضيع المسافه؟
***
يا عمر…
بعد في وقت تا ننطر؟
وإنت متل الحرامي.
بتفوت عالبيوت
وبتسرق الدفاتر
والأيام الحلوه.
وبتاخد الأسامي.ويا ريت شي مره
بتعطيني صدفه غريبه
تا قول لحبيبي…
إنو هوي حبيبي.
***
انا معك بكبر.
متل ما الشجر بيكبر.
والبحر بيكبر.
الشتي ما بيغرقنا.
والهوا ما بيسرقنا.
أنا وأنت متل السما والأرض منتلاقى …
كلما اللحظه بتفرقنا.
***
يخليلي هالقمر الحلو.
أول قمر بيضوي
٢٤ ساعة وما بينام…
إلا عا مخدة أحلام .
***
وين الحلو؟
لا بالسوق لقيتو،
ولا عالعين حاكيتو.
متخبا من البرد يمكن…
والدني شوب وصيفيه.
ضاع مني
بين مبارح وبكرة…
وخايفه لا ينساني.
وهوي بينسى صبيه وبيعشق صبيه.#كلود_ناصيف_حرب