قصر اشقر للشاعر الاستاذ فؤاد نعمان الخوري لقصيدته الثرية قلبا وقالبا خلال افتتاح صالون الدكتورة بهية ابو حمد

الشمال نيوز  – عامر الشعار

My sincere thankfulness to Poet Fouad Neeman El-Khoury for his rich Poem
الشكر الكبير للشاعر الاستاذ فؤاد نعمان
الخوري لقصيدته الثرية قلبا وقالبا
************************************
قصر أشقر
،،،،
(في افتتاح صالون الدكتوره بهيّه أبو حمد)

بْ “بانشبول” اليوم زِرت كنيستَينْ:
كنيسه لْ مار شربل دخيلُو مكرّسِهْ؛
والتانيه للشِعر علِّت قبّتَينْ
ومتل الصلا، عندي القصيده مقدّسِهْ!

بحيّي “البهيّه”، بقلّها ها الكلمتَينْ:
عَ الشعر والإبداع انت الحارسِهْ،
المْؤسسه بتكون اكتر من تنَينْ
وانتي لوحدِك يا “البهيّه” مْؤسسهْ!

انتي لكي عا كل اهل الذوق دَينْ
والحُب عندك تضحيه وممارسِهْ؛
ومن هون عا لبنان خفق الجانحَينْ
وبالشغل انتي وعقرب الساعه سوا
لا بتوقفي ولا بتتعبي ولا بتنعسِي!
،،،،،،،،
يا فاتحَه قلبِك وصالون الأدبْ
خايف عليكي من حزب قلّة أدبْ؛
حزب الركاكه والتذاكي والغرورْ
حزب القصيده اليابسه متل الحطبْ…

عندي الشِعر احساس مصقول وشعورْ
وفرحة نبيد الخابيه كلما انسكبْ؛
وأهل الشِعر اوركسترا متل الطيورْ،
وما سمعت مرّه الطير طالب باللقبْ!

انتي بها العتم الثقافي خيط نورْ
ونسمة هوا للّي عصَر جرحُو وكتبْ؛
أهل الوجاهه والغنى بيبنُوا القصورْ
وقصرِك خشب، والناس دقّوا عَ الخشبْ،
وقلبِك قصر أشقر مطعّم بالدهبْ!
،،،،،

سيدني – 21 كانون الأول 2023