بلال حمزة يوجه رسالة صارخة الى الرئيس ميقاتي

الشمال نيوز – عامر الشعار

وجه رئيس مجلس إدارة شركة البرقان التجارة والبناء بلال حمزة على صفحة التواصل الخاصة به ، رسالة صارخة إلى رئيس مجلس الوزراء نجيب ميقاتي قال فيها:

بسم الله الرحمن الرحيم

السلام عليكم ورحمة الله وبركاته

بدي وجه هل رسالة إلى دولة الرئيس نجيب ميقاتي وكل من يهمه الأمر على صفحات التواصل الاجتماعي .. بعد ما تسكرت كل الأبواب ادامنا ..

بإسمي أنا بلال حمزة صاحب شركة البرقان للتجارة والبناء في عكار والمنية والشمال وباسم اخوتي التجار والمقاولين وأصحاب الورش وكل يلي بيشتغلوا بقطاع البناء ..

دولة الرئيس.. نحنا منعرف انك مشغول كتير .. وهموم كتيرة فوق راسك .. ومنعرف انك حابب تشتغل وحابب تعمل شي حتى تريح الناس ..
دولة الرئيس.. نحنا التجار قصتنا مش صعبي كتير .. لكن بدها تقعد معنا وتسمع صوتنا .. وتشوف مشكلتنا يلي عمرا سنوات وسنوات.. وخاصة في شركة الترابة الوطنية – اسمنت السبع .. يلي هي عم تتعرض كل فترة لضغط وتهديد بالاقفال بحجة البيئة، ونحنا والتجار والعمال عم نتعرض لخطر الإقفال والبطالة ..
دولة الرئيس.. من فترة ونحنا عم نطلب لقاء معك حتى تحل هل مشكلة ما حدا عم يرد علينا .. انت عارف ان عشرات آلاف اللبنانيين مرتبطين بقطاع البناء ..
بدي أسأل .. ليش هل تجاهل .. ليش هل اهمال .. ما حدا عم يرد علينا .. هيدا التجاهل مش مقبول .. نحنا عصب البلد .. نحن الجيش التاني لبناء لبنان ..
لازم نشوفك وتسمع صوتنا وتحل هل مشكلة مع الوزراء المعنيين .. وتدعموا الصناعة اللبنانية وتوقفوا حدنا وحد شركة الترابة الوطنية – اسمنت السبع وكل شركات الإنتاج.. لازم تمنعوا الاستيراد ..
دولة الرئيس نجيب ميقاتي.. لازم تسمع صوتنا.. يكفي تجاهل لمطالبنا .. يكفي استهتار بأهم قطاع ..
طلبنا موعد ربع ساعة حتى تنحل مشكلة كبيرة .. ما شفنا تجاوب ابدا” وكأن المؤامرة علينا …

دولة الرئيس .. نحنا منعرف وقتك من دهب .. لكن نحنا شغلنا كمان اغلى من الدهب ..

نحنا مش ثوار 17 تشرين .. نحنا ثوار لحماية الصناعة .. نحنا ثوار لمنع الاستيراد .. نحنا ثوار لحماية قطاع البناء والأعمار وثوار لحماية حقوق الناس والعمال والتجار والمقاولين وأصحاب الشاحنات وأصحاب ورش البناء ..

دولة الرئيس.. لازم نشوفك وتسمع صوتنا .. بيكفي تجاهل مطالبنا .. اليوم عم نطلب موعد على صفحات التواصل الاجتماعي امام الرأي العام اللبناني …
ناطرين الجواب وتحديد الموعد مع نخبة من التجار ورجال الاعمال والمقاولين والعمال بالقريب العاجل.. بالسراي الحكومي أو طرابلس ..

نحنا امام خيارين .. اما لقاء رسمي وفقا” الأصول .. او لقاء جماهيري بسيارتنا وشاحناتنا وعمالنا في تظاهرة كبيرة .. ؟؟؟
بانتظار ردكم ..

اخوكم بلال حمزة

للاطلاع على الفيديو الرسالة .. الضغط على هذا الرابط :

https://m.facebook.com/story.php?story_fbid=1539056123135083&id=100001386058596&sfnsn=mo