خواطر مغترب.. ها قد وصلنا إلى نهاية فصل آخر من المسرحية
الشمال نيوز – عامر الشعار
ها قد وصلنا إلى نهاية فصل آخر من المسرحية…
ها نحن قد وصلنا إلى نهاية فصل آخر من المسرحية المستمرة لتمرير الوقت و تغطية استمرارهم بالنهب المنظم لما تبقى من مقدرات البلد و الآتي من الواردات، و إعطاء الفرص لبنوكهم بسلب المودعين خاصة المضطرين منهم لودائعهم، فبدأوا بنصبة الشيك المصرفي الذي يخسر ٧٠٪ من قيمته أي يُصرف ب ٣٠٪ من قيمته و تبّعوها بالسحب على سعر ٣٩٠٠ ليرة للدولار و هو اليوم ب ٢٧٠٠٠ أي تخسر ٨٥٪.
و التعميم الأخير الذي ينص على السحب على أساس٨٠٠٠ ليرة أي تخسر ٧٠٪ فقط، و كل هذه التعاميم التي يصدرها مصرف لبنان هي غير قانونية لأنها تبيح للمصارف سرقة مودعيها و لا يمكن لأي مشرّع أن يصدر قانون يشرّع السرقة، و كم من المليارات سرقت بنوكهم و ما زالت مستمرة!
طالما أن الليرة خربت بيتنا و عم تكلفنا مبالغ طائلة لموظفي البنك المركزي و ما حدا قادر يكبح جماحها بسبب شوية لصوص و مافيات عم يتلاعبوا فيها طلوع نزول، ليش ما منوقف التعامل فيها و منعتمد على عملة عالمية مثل الفرنك السويسري بما أن لبنان هو سويسرا الشرق؟
و هيدي فكرة خام يجب أن تُدرس من المختصين لحين اعتماد عملة لا يتلاعب بها أحد.
و ذكرنا مراراً أنه مطلوب منهم تدمير البلد و ايصاله إلى الخراب التام، فاختاروا طريقة حديثة للتدمير الذاتي هي بافتعال الأزمات
و تعطيل أي اصلاحات أو صيانات
فتتوالى الانهيارات
و تهدم المؤسسات و تملأ بالحفر الطرقات
و تُقطع المياه و الكهرباء و يقولون انهم سيقطعون التلفونات و الانترنيت
و الهيئة ما تربوا من يهديك المرة لما بدهم يزيدوا الانترنيت نزلت كل الناس عالشوارع و بدأت الثورة و المواجهات، و اليوم في ألف سبب و سبب لحتى يرجعوا الناس على الانتفاض عليكم، هيدا غير ٣٠٠-٤٠٠ ألف هاجروا و هربوا منكم… و الله يشفي اللي انجرح و يرحم اللي مات….
و ما الأزمة المفتعلة اليوم إلا إعادة لنفس السيناريو بغير أشخاص، تعجز الحكومة فتستقيل
و بضلّوا شهور عديدة بدوْروا على البديل
و بعدها بضيْعوا ٧ شهور عالتشكيل
و بعدها أسابيع على البيان الوزاري و الصور التذكاري لكل هالرعيل
و الوزراء بيصرفوا شهور لدرس ملفاتهم و بيطلعوا بخطط جديدة و بروحوا ليجتمعوا بِصير تأجيل
ولأسباب عديدة تأجلت و لكن أهمها انو البلد مصابة بمرض التعطيل
و ما بخلّصنا غير الله و يبعتلنا شي واحد شهم و قوي و كتافه عراض و بيقدر يشيل
و اليوم إجانا (( غوتيريش )) أمين عالم الأمم المتحدة، ديبلوماسي و مهذب و مبسوط فينا و ممنون و معترفلنا بالجميل
لأن أجدادنا الفينيقيين هم اللي بنوا برشلونة بلده لما كانوا مسيطرين على البحر الأبيض بالأساطيل
و عم يحكي معهم و يترجاهم بكل أدب أن يعملوا شوية إصلاحات لحتى يقدر يساعدهم و هني بقولوله حنعمل و حنسوي بس ابعت المصاري و لا يهمك مثل ما قالوا لماكرون و غيره من قبل،
و لا عملوا و لا حيعملوا و الظاهر انو بَيْهم أقوى من بَيو لغوتيريش و أبو غوتيريش.
و الظاهر انو اللي عم نطلب يساعدونا هني بيشتغلوا عندهم و لهالسبب مش سائلين
و الكل ناطر الانتخابات و كل القوى العالمية بتعرف انهم مفصلينها على مقاسهم و لن تغير أي شيئ يُذكر إلا اذا المجتمع الدولي غيّر القانون و عملوا الانتخابات على أساس قانون الستين أو قانون فؤاد بطرس و أشرف المجتمع الدولي عليها بمراقبة قوات الأمم المتحدة.
ملاحظة: لماذا لم يبادروا بإصلاح أي شيئ لحد الآن و ما عذرهم؟ لأنهم ناويين عخرابها مش عإصلاحها…
مَن كان يصدّق ان الفينيقيين الذين بنوا أهم و أجمل المدن في أوروبا مثل برشلونة، أحفادهم يعيشون بالفقر و الجوع و العوز و العتمة…..
فاحذروا من لعنة الفينيقيين من أن تصيبكم كما أصابت لعنة الفراعنة شعوباً في الزمن القديم.
و لو علم الفينيقيون الذين كانوا أسياد البحر الأبيض أن بلدهم الأم تحكمه مجموعة من القراصنة لانقضوا عليهم و قطّعوهم إرباً.
