ابتسامه بعيوني متل حلم الفرح

الشمال نيوز – عامر الشعار

#كلود_ناصيف_حرب ⚘
*ابتسامه بعيوني*
أجمل شي بالربيع
هوّي إنت…
وأحلى شي بالعطر
همساتك.
عيوني فيهن حكي…

كل شعر حلو
كل همس حلو
ما قدرت قولو…
هوّي سكوت
وابتسامه بعيوني.

زمن قصايد الربيع…
ومن تحت العريشه
عم لوّحلك بشال الحرير…
وقلك مع زهر اللوز
وعطر الورد والياسمين:
يا حلو
وين الكلام الحلو؟
***
رح ضل شمّ رسايلك
وضمها لقلبي…
وقلك يا قمر:
لا تغيب عن بالي

يا غالي
خلّيك حدّي
وبعتم الليالي…
وكلّ صبح وعشيّه
طل عليّي
تا يبقى الفرح بعينيّي.
***
*متل حلم الفرح*

ما في ورد بالسوق
قطفتلك ورد من قلبي…
مش هالمره بس…
كل مره
يا احلى جنينة ورد بعمري.
رح قلك اليوم
وبعد اليوم:
انت انت انت
كل نبض القلب
وحنين الروح.
***
لبِستَك انا متل تياب الحرير…
وصرت غني الك
مع فيروز
وابعتلك حمامه
تا تقلك: انت احلامي
والعمر اللي قدامي…
وهيك #بحبك.
***
إنت نجمة حروفي
وضو الحبر
عا سطور الخلود.
***
سألوني الناس عنك
جاوبت: إلو وحدو
غنّيت حروفي.
من قلب جرح العمر
مرقتْ متل حلم الفرح…
وتيابك البحر والكلمه
يا ريت برْجع للطفوله
وتمرجحني عا ايديك
وما خليك تكبر
وقلك: انا هيك #بحبك…
واكتر من هيك.
***
*للحنين عطر*

رسالة حبّ
فيها اسرار غميقه.
ببعتها لعندك.
يمكن تخبرك كل الحقيقه
وتقلك:
هيك انا #بحبك.

كل فرح بغيابك
بيكون فرح الكذبه.

قمر الصبح
وعيون مليانين احزان
بيحاكو قلبي.

جوز معلمين
بيعلموني السهر والحرمان.
***
ناطره يا زمان
عا شط بعيد
تا يرجع حبيبي.
والسفينه فيها ناس كتار
كبرو من مبارح لليوم
والنطره عم تكبر
قد البحر واكتر.
تاري السفينه
متل الايام الحزينه.
لا رجعتلي عيونو الحلوين
ولا قال نحنا مشتاقين.
ويمكن بالبحر تغرق هالمدينه.
***
بتعرف انو للحنين عطر؟
بيسرح عالشبابيك بالليل.
بيفوت عالاحلام.
وبس شوفك باحلامي
رح اهديك من عطر قلامي
لانك فرح عمري
وقصيدة خلود
يا خلود ايامي.
***
*إذا كلّ البيشوفك بيحبّك*

متل موج البحر أشواقي
بس الأشواق بتروح لعندك
وبتخبّط عا شباكك
تا تفيقك من النوم
وتبعتلي من عندك خبر.
شي كلمه زغيره
ترجّعلي الضحكه.
ترجّع الحبر للسطور.
***
من وقت اللي سكت كلامك
سكت كلام الروح
وصار زمن القصايد
خريف بهالبيت
اللي أحلى من الخيال
انا وانت والقنديل
وقلتلّي: بحبك
ووقعت نجمه
من الليل الطويل.
***
إذا كل البيشوفك بيحبّك.
يا دلّي انا!
وشو بيبقى لي انا؟
رح اطفي الراديو
وامحي الغنّيه
تا تبقى حواليّي
وما ياخدوك مني
نسوان جهلانين
يا امير الحلوين…
يا قمري الغالي…
اللي غيرو ما بيحلالي…
وهيك أنا #بحبك.
***
*بس شوفك يا حلو*

عطر الحنين
صرلو سنين
سارح عا شباكي…
وانت من بعيد
بتبعتلي جنينة فرح،
وشال الربيع المعرق
وإسوارة الزنبق
يا غالي عا قلبي
يا عيون ما بتنام
يا حبي اللي بيبقى
متل السما الزرقا
عا طول الايام.
***
لعيونك المشتاقه
هيدي الورده
وبس شوفك يا حلو
رح إعطيك
من حنيني باقه.
***
شو بتقول هالمعزوفه؟
بتقول:
أحلى موسيقى عيونك…
وأغلى صباح
صباح حنيني إلك.
***
من سحر همسك
الربيع صار حروف عم تضوي
وشجرة اللوز
عرس لطيور ملونه…
يا عيون قد السما
بحكي معك بالوما
وبحب شوفك كل لحظه
تا قلك: أناااا بحبك…
ولو ما انت كل الحلا
ما كانت حلوه الدني.
***
وين الغالي عا قلبي؟
متخبا خلف الجبل العالي…
ورا الحنين…
ما بيبعت للغاليين
لا ورده،
ولا حروف مجروحين…
بسأل عنو الحيطان
والليل والرعيان…
قالولي: سافر عا بلاد بعيده
وكلما بشتقلو
بوديلو سلام
مع طير الحمام
مع نسمه متل أشواقي
ما بتهدا ولا بتنام.

#كلود_ناصيف_حرب