بلال حمزة للمسؤولين: إرحموا الناس يا حيتان السلطة والمال

الشمال نيوز – عامر الشعار

وجه رئيس مجلس إدارة شركة البرقان للتجارة والبناء بلال حمزة رسالة نارية صارخة بوجه المسؤولين ناشدهم فيها التحرك من أجل الحفاظ على قطاع البناء والتمديد لشركة الترابة الوطنية – اسمنت السبع وشركات الإنتاج الاخرى وفتح المقالع في المنطقة، وتوجه حمزة بتهنئة اللبنانيين بعيدي الميلاد ورأس السنة وقال في الرسالة :

مسا الخير

أول شي بدي عيد الجميع في لبنان والعالم بعيدي الميلاد ورأس السنة … بتمنى للجميع كل الصحة والخير والسعادة وراحة البال ..

يمكن مش وقت العتاب واللوم بهل فترة الأعياد.. لكن بعدو الوجع ذاتو …

لكن اسمحولي بهل مناسبة احكي وجع الناس .. وكل واحد وجعو أكبر منو .. وخصوصا” نحنا تجار الاسمنت ومواد البناء في لبنان .. مشكلتنا كبيري كتير وكل سنة عم تكبر اكتر ، والسبب صار معروف .. وانتوا بتعرفوا وبالأخص المسؤولين والوزراء والرؤساء واليوم رئيس الحكومة نجيب ميقاتي بيعرف كلشي .. من سنوات كتيري وشركة الترابة الوطنية – عم تتعرض لخطر الاقفال وطرد العمال وتسكير ابوابا وتسكير المقالع لأسباب بيئية وكيديات سياسية وسمسرات، وبسبب تجاهل الوزارات المختصة لهل قطاع ونحنا عم ندفع الثمن ولا حياة لمن تنادي..

مادة الاسمنت ومواد البناء أساس الاقتصاد اللبناني وأساس أعمار هل بلد، من سنوات عم نعيط ونصرخ ، شوفوا حل يا رؤساء يا وزراء يا مسؤولين، حاجي تضربوا القطاع الصناعي والإنتاجي في لبنان ، نحنا بدنا نشجع الصناعة ، عملوا حل ، النا فترة ونحنا عم نحاول نلتقي مع رئيس الحكومي الأستاذ نجيب ميقاتي .. وبعتنالوا نحنا وعمال شركات الترابة والتجار ، طلبنا موعد ربع ساعة حتى نشرحلو كل التفاصيل ويوجدلنا حل جذري مع الوزراء المختصين، حتى يمددوا لشركة الترابة الوطنية وكل الشركات ويمشوا مصالح الناس .. والكل بيعرف انو هل قطاع اهم قطاع بلبنان ومئات آلاف العائلات بيعيشوا منو .. لكن للاسف ما حدا عم يرد علينا ..

الكل بيعرف انو مادة الترابة هي الاوكسجين الأساسي للبناء والأعمار في لبنان ..
وتراجع الإنتاج اليوم بسبب إقفال المقالع وتجاهل الدولة والحكومة والوزارات المختصة لهل قطاع والكل بيشل عن ضهرو وبيحط على غيرو ،
انا يلي شايفو القصة سياسية وسمسرات وتوزيع حصص وفرض خوات جديدة على شركة الترابة الوطنية وشركات الإنتاج بحجج بيئية ..
يا اخوان الشركة تحت سقف القانون وملتزمة بكل الشروط البيئية …..
اخيرا” بدي ناشد أصحاب الضمائر .. واسأل وين مصيرنا في العام 2022 .. شو بقي من لبنان كل شي عم يدمر.. لمين بدنا نشتكي بعد الله، بدكن يانا نشتكي للامم المتحدة أو لجامعة الدول العربية او المجتمع الدولي أو تدخل دولي حتى نشوف حل لمشكلتنا ..
وبدنا نسأل دولتنا هل المطلوب تهجير التجار ورجال الأعمال بعد ما هجرتوا الأطباء والمهندسين وأهل العلم من لبنان … ؟؟؟؟ لأيمتا بدنا نضل مشردين بالشارع والمقالع مسكرة والعمال عاطلين عن العمل ؟؟؟، نحنا ثوار الانماء والأعمار.. ثوار من أجل حماية الصناعة، بدكن يانا ننزل نحنا وشاحناتنا وعمالنا نحتفل براس السنة بساحة الشهدا ببيروت ، نحنا حاضرين وجاهزين، بدكن تعيدوا على هدير الشاحنات وصريخ العمال نحنا حاضرين …
بيكفي استهتار وظلم وفساد وسمسرات وتلاعب بمصير الناس .. دلونا وين المشكلة خلونا نحلا .. حرام عليكن يا حيتان السلطة والمال ..
مش قادرين ننطر اكتر .. بدكن تطفشونا من هل بلد .. لوين بدكن تاخدونا ؟؟ اكيد مش آدرين تاخدونا ولا محل .. نحنا رح ناخدكن على العصفورية .. اما رح تجنوا أو رح تجننونا …

واخيرا” بدي هني اهلنا بعكار وكل لبنان وكل العالم بعيد راس السنة واتمنى الخير لكل الناس…
والسلام عليكم ورحمة الله وبركاته ..

لمشاهدة الفيديو .. الرجاء اضغط على هذا الرابط:

https://m.facebook.com/story.php?story_fbid=4722698624452842&id=100001386058596&sfnsn=mo