يوسف بو ناصيف يرعى ترويقة لسيدات طرابلس

الشمال نيوز  – عامر الشعار

بدعوة من لجنة السيدات في حملته الانتخابية ، رعى المرشح عن المقعد الماروني في طرابلس يوسف بو ناصيف ترويقة لسيدات طرابلس في مطعم دار القمر في الضم والفرز – طرابلس ..

وذلك في حضور حشد نسائي من رئيسات جمعيات وناشطات في هيئات المجتمع المدني واعلاميين واعلاميات ..

بعد النشيد الوطني اللبناني وعرض فيلم وثالقي عن طرابلس ورؤية المرشح بوناصيف التنموية تحدثت مقدمة  الاحتفال المسؤولة الإعلامية فيرونيك خباز ، التي رحبت بسيدات طرابلس والشمال والحضور الكريم وقالت :

وجودكن اليوم بهالعدد وبهالروح منو تفصيل.
هو دليل إنّو المرأة بطرابلس دايماً حاضرة وقت الجدّ.
منلتقي اليوم كسيدات بيجمعنا حب مدينتنا، الإيمان بدورنا، والحرص على مجتمعنا وعلى مستقبل ولادنا.
هاللقاء منو مناسبة شكلية، ولا كلمة عابرة، هو مساحة نقرّب فيها من بعض ونسمع من بعض ونحكي بصدق مع بعض.

وعراب لقاءنا اليوم بيعرف قيمة هالمساحة، وبيآمن إنّ المرأة ما بتقعد على الهامش، بل هي موجودة بقلب أي تغيير حقيقي وأي قرار.
كلمته اليوم مش خطاب، هي دعوة للتفكير، وللشراكة، ولحوار بيشبهكن وبيشبه طرابلس.
بهالروح، وبكل محبّة، منرحّب بالمرشّح للانتخابات النيابية عن المقعد الماروني ب طرابلس الإستاذ يوسف بو ناصيف إلك الكلمة.

كلمة بو ناصيف

ثم القى المرشح يوسف بو ناصيف كلمة قال فبها:

المرأة بطرابلس مش استثناء/ ومش حالة/ ومش عنوان عابر.
المرأة بطرابلس/ هي اللي بتعرف تتحمّل/ وتعرف تقرّر/ وتعرف توقف كل مرة / حتى لما الطريق يكون صعب.
نحنا ما عم نحكي عن دور واحد/ عم نحكي عن أم بتربّي وبتحمي/ عن عاملة بتثبت وجودها/ عن سيدة مجتمع بتقود وتبادر/ وعن صبية عندها طموح وجرأة ورأي.
المرأة هي اللي بتربّي أجيال/ وبتحفظ القيم/ وأول وحدة بتدفع تمن الانهيار/ وآخر وحدة بتستسلم.

المرأة اللبنانية/ شالت البيت وقت غاب الاستقرار/ ربّت الولاد لما غاب الأمان/ وضلّت واقفة/ لما تعبو الرجال.
هيدا مش توصيف/ هيدا واقع.
طرابلس مدينة بتقوم على ناسها/ والمرأة فيها جزء أساسي من هالقوّة/ مش من ورا الستارة/ بل بقلب المجتمع/ بالبيت/ بالشغل/ وبالمساحات العامة.
المرأة هون ما بتنطر الفرص/ بتخلقها.
وما بترفع الصوت لتُسمَع/ صوتها حاضر لأنو موقفها ثابت.
وأنا مؤمن إنّو أي مجتمع بدّو يكبر/ بدّو يعترف بهالقوّة ويشتغل معها/ مش بدالها ولا فوقها.

المرأة عندها رؤية/ عندها حسّ مسؤولية عالي/ عندها قدرة طبيعية تشوف التفاصيل وتحمي المستقبل.
من هون/ وجودكن بالحياة العامة منو شعار/ ولا توازن أرقام/ ولا واجب شكلي.
هو عنصر أساسي/ لأي عمل جدّي ولأي قرار صح.

بالنسبة إلي، العلاقة معكن مش مناسبة/ ولا خطاب.
هي تواصل مفتوح/ وحوار دائم/ واحترام لرأيكن/ ولخبرتكن/ وللدور اللي بتلعبوه كل يوم/ من دون ضجيج.

طرابلس بتتقدّم/ لما كل طاقاتها تكون حاضرة/ والمرأة هي من أهم هالطاقات.
واليوم/ هاللقاء لكلو محبة وخبز ملح/ منو لأنو في شي ناقص/ بل لأنو في قوّة لازم تضلّ حاضرة/ مسموعة وشريكة بالفعل.

وقبل ما أختم/
بدي اتشكر من القلب/ كل وحدي منكن/ وخاصة لجنة السيدات/ اللي بادرت/ ونظّمت هاللقاء/ وجمعتنا اليوم بهالمساحة.
شكراً لوقتكن/ لثقتكن/ ولحضوركن الفاعل.
منلتقي اليوم/ لنسمع منكن بقدر ما تحبّوا تسمعوا منّا/ لأن الحوار الحقيقي دايماً طريقه باتجاهين.
هاللقاء منو محطة عابرة/ بل خطوة ضمن مسار تواصل مستمر/ واحترام متبادل/ وشراكة قائمة على الوعي والمسؤولية.

يعطيكم العافية وشكراً لوجودكن.