الزميل سايد مخايل في رثاء (أبو جان) الشيخ نعمة الله حنا ديب في سيدني
الشمال نيوز – عامر الشعار
“بو جان”
الشاعر سايد مخايل
“بو جان”جينا بهالصباح نودّعك
ومن قلبنا كلمة محبه نسمّعك
من عيلتَك لو خطفك الموت الرهيب
بعدك التاج وما تغيَّر موقعَك
بآخر الايام خالفت الطبيب
وطلبت من جان ، وع بيتَك طلّعك
كان الأمل عندك بسرعه رح تطيب
وعا ارض مزياره الحنونه يرجّعَك
وما كان عارف امنياتو رح تخيب
وتسقط عا قلبو الآخ كلمَا توجّعك
وما كان عارف شمس عمرَك عالمغيب
ومن بعد مدِّه بالجسم ما بيقشعك
وما كان عارف هيك فجأة رح تغيب
وتدشر العيله قبل راس السنه
وما تعيّد الميلاد هالمره معك …
دشرت يا بو جان عيله مباركه
بسيدني وارض لبنان إسما مفخره
مشيت ع درب الخير فعل بلا حكي
تداوي قلوب بهالظروف القاهره
ما بتقدر تأخر طلب للمشتكي
عيله لفعل الخير ايدا حاضره
وما يوم شفتا مشربكي وملبكي
ولا بيوتها شفتا عَا غيرا مسكره
واليوم خسرت بِ غيابَك معركه
برجالها …وستاتها…والاصهره
لا تخاف بعدا عامرا هالمملكه
بباقه من الاحفاد ورد مزهره
وبعدا ب ست البيت عيله مباركه
ولو هدّها كبر العمر والختيره ..
يمكن هوا كانون اوراقَك تكي
لكن الشجره اللي زرعتا عامره
وكل ل عرِف بغيابَك بقلبو بكي
وشارَك العيلة دموعها واوجاعها
وصلوات ودَّا ترافقَك عالمقبره ….
كنت مع جوليات تفرح بالشباب
ويتجمّعو الكبار حدَّك والزغار
وما كنت تعمل للدني كلاَّ حساب
ومع جان تشعر بالثقة والإفتخار
تشوف الدني مع جورج شمس بلا غياب
وكنت البنات تشوفهن قامات غار
طالع عَا مطرح لا هموم ولا عذاب
ما في حد يخلِّد بدنيي فانيه
وما في حدا يأخر بهالرحله نهار
سيدني، استراليا ?? في وداع الراحل نعمة الله حنا ديب من مزيارة، ?? في ٦ كانون الاول ٢٠٢١ .
?✏️ #Poet Sayed Mikhael
