كرمالك يا فرح رتبت المواعيد ..!!

الشمال نيوز – عامر الشعار

*كرمالك يا فرح
رتبت المواعيد*

#كلود_ناصيف_حرب

نهر اشواق بيروح
من عندي لعندك.
بياخد معو انتظاري.
لو هالعينين بيلتقيو.
بيحكو. وليش الزعل
***
متل الغيم الازرق؟
سنين سنين هني الوجع وحكاية عن تنين حبو
ولبسو تياب السهر.
لا هني بيلتقيو
ولا الحب بيخلص.
لانو الحب هوي الحياة… وهوي القدر.
***
لأنك بعيوني وقلبي .
بركض متل الريح المجنونه.
وعيوني اللي فيهن
انت انت انت
بيحكو عنك وبيفضحوني.
***
هالضحكه لمين؟
ما بملك منها
شي إلا وجع الحنين.
***
يخليلي هالضحكه.
بهديها فرح قلبي…
أجمل من العيد إنت…
يا عمر جديد.
***
لو كانو عيونك مخبايين.
بعدهن بيكتبو فرح
عا كتاب قلبي
وبين الورود ومع الشتي بخبيلك وردة .
***
يا ريت بلتقي فيك حبيبي
تا قلك كلمه وحده.
ويبقى صداها
أطول من العمر.
رح قلك بحبك .
يا أجمل قصيده بالعمر.
***
سلام لقلبك الساحر الحلو.
محبتك
تضيء على السطور…
وتكتب أرق الشعور.
***
الورده بتفتح
عا إسمك واسمي.
تا تكون أحلى رسمه.
وهالعبير من أشواقك
وما أحلى أشواقك
بيلحقوني
عا مطرح اللي بكون.
ونظره منك بتفرح الدني
يا أحلى عيون.

كلود ناصيف حرب