خبّي الإشيا الحلوه

الشمال نيوز – عامر الشعار

#كــــلود_نــــاصيف_حــــرب
*خبّي الإشيا الحلوه*
#كلُود_نَاصِيف_حَرب
كلّ ليله بحاكيك بالأحلام
ورنين صوتك بعيد وقريب…
إنت إنت إنت…
وهيك بحبّك.

كلّ شي حلو بيذكّرني فيك.
خبّي الإشيا الحلوه
ولو كنت عنّي بعيد…

تا تسمع صوتي
أنا وعم حاكيك

تسلملي يا همسة الصباح.
اشتقت لكلامك
يا حلو العينين.

ما بحبّ أحلامي
إذا ما كنت فيها…

ليلي بيصير ضجر
وقمري سفر…

هدايا المسا
من جنينة عمر…
تا تكون إيّامك عطر.

صباح الحلوين…
أنا وإنت وجنينتنا
وعيون مشتاقين….

وبعدو شالي المعرّق
مشلوح بين المقعد الأزرق
وشجرة ياسمين.

بعدا الابتسامه ذاتها…
بتوعّي الشعور المليان تعب…
بتشيلني من التلج
وبتودّيني عا بلاد حرير
ومنجيرة قصب…
هيك بحبّك أنا

وحنيني إلك بالجمر انكتب…
هيك بحبّك.

*إنت قدري وعمري*
#كلود_ناصيف_حرب

ابتسامة حرير إلك يا أمير…
نور عيوني وسحر جفوني
والكلمه والنغمه إلك…

كلّ ما بتطلع فيك قدّام الناس
بحبّ قلّك:
هيك اشتقتلّك…

وإن كنت مشغول
مع حدا غيري… يا دلّك.

الحلو من جمالَك
يا سكّر بيدوب…
وممنوع التجوّل
تحت الشتي.

صباحات إيّام حلوه…
وبسّ الغيمه تروح
عا بلاد بعيده
منرجع منتلاقى
وبعطيك من حنين روحي باقه…
وبقلّك: هيك بحبّك.

شو هالزياره بنصّ الليل؟
والنجوم عم يتمرجحو
من ميل لميل…

يسلمو هالعيون الغاليين
والابتسامة الأرقّ من زهر الياسمين…

وقدّيش اشتقنا لهمساتك الحلوين..

عا طول الزمان
عا طول الليالي
إنت قدري وعمري
وسلّمتك أمري.
يا حبيبي الغالي.

*طلعت من أفكاري*
#كلود_ناصيف_حرب

منتلاقى كيف؟
متل البحر والمينا…
متل الحبر والكلمه
بقصيدة غزل…
وصورتك مرسومه
عا شالي العنابي…
والناس خبّرو عنّي
إنّي حبيت
ونطرتك شي سنه
عا باب البيت…
يا مسافر لبعيد
ومش عارف شو بدّي
كتر ما فكّرت فيك
طلعتْ من أفكاري
وصرت تمشي حدّي…
وهيك حبّيتك.

*تهْموني بالسرقه*
#كلود_ناصيف_حرب

تهموني بالسرقة
وأخدوني عالمخفر…
ووقفو حواليّي العسكر
قالوا:
إنتي سرقتي الياقوت
تا تعمّري بيروت
بيوت ورا بيوت
وكتبتي عالمفرق
بالزهر المعرّق:
لبنان ما بيموت.
قلت بالصوت العالي
اللي بيجْرح الليالي:
طالما في شمعة أمل
وليل وقمر وسهر
رح يرجع وطني
من رحلة سفر…
ويرجع لنا عطر الياسمين
عا دروب الحنين.
بيقولو وطني زغِير؟
وهوّي قدّ الدني
وأغلى من الدني بكتير…
ومهما صار
يا زمن غدّار
باقي لنا لبنان
والمجد الكبير.

*حبيب سهري*
#كلود_ناصيف_حرب

أنا لحبيبي وحبيبي إلي
تا ينطفي الوقت
ويصير البحر صحرا.
قمر تا يسهر
ويخبّرَك أسرار…
وقدّيش عمر هالقمر؟
كم سنه
وعنوانو حنين…
وأحزان قدّ الدني…
يمكن يغرق
ويزعلو أهلو عليه…
هيدا قمري
وحبيب سهري
عا رمشي بيمشي
وبيغفا بعيوني الحلوين
وأنا عيوني بحيره
ومراية حرير
لقمر غالي كتير.
اشتقت للقهوة…
وأطيب قهوة
صوتَك يا حبيبي…

بتذكّر قلتلّي مرّه:
لو ما عيونك
بيموت الشعور…
نظراتك سفر…
وضحكاتك نغم عصفور…
وهيك بحبِّك..

*ممنوع النسيان*
#كلود_ناصيف_حرب

ممنوع النسيان…
وأنا كيف بنساك؟
بترافقني عالطريق…
بتمسك بإيدي
بتخاف عليّي
من الليل والشتي
إنت اللي عطيتني الفرح
من بعد الأحزان
إنت القصيده بكتابي
كتبتها بدموع الحنان
وعنوانها:
ممنوع النسيان.

*روح يا نسيان*
#كلود_ناصيف_حرب

كيف بيهرب الوقت
من بين إيدينا؟
لا حكينا ولا حكيو عينينا
بعرف قدّيش عندك كلام
وبالصدفه ما التقينا…
قولك بهاك اللحظة
شو رح بتقول؟
الكلمات رح يصيرو غابه
وأنا بغمّض عيوني
تا إسمعك أكتر…
بالعتمه
بيكون الهمس أحلى…
بحبِّك أنا بحبِّك

بيصيرو الحروف موّال
ولمسة إيدك عا كتفي شال
روح يا نسيان
وتعي يا هاك الصُّدفه
تا لاقي حبيبي
ويصير كحل عيوني شِتي
واللون العا شفافي قصيده
والشمس إسوارة بإيدي

*إنت حبيبي*
#كلود_ناصيف_حرب

هالصوره اللي كلاّ حنين
وعيونها جوز سرّاقين
من نومي سرقوني
وبالريح تركوني…
ويا ريت
الغابه القريبه بتجمنا سوا
ويطير شَعري بالهوا
وما بخاف من الليل
وإنت حبيبي
عم بتلبّسني إسوارة النجمه
وتقلّي:
أنا بحبّ عينيكي
أنا حارس عمرك
وما بغيب من حواليكي
ورح عمّرلك قصر بالعالي
مطرح الما بيوصلو الخيّاله
من كتر ما بغار عليكي…
وهيك بحبِّك.

حروف اسمي
#كلود_ناصيف_حرب

حروف إسمي
بتاخدلك النسمه
حروف اسمي
متل موج البحر بتتكسّر
إلا موعدي
مع رمش عيونك
هوّي البحر
والسما والأرض
وأبجديّة حبّك حروف قليله
مكتوبه عا قلبي
للخلود…
وهيك بشتقلك

*من لون ضحكتك*
#كلود_ناصيف_حرب

صرت أعرف إنّو النور
من لون ضحكتك
وهالسما اللي متل الخيمه
بتوشوش ويتقول:
إذا ما كان الحبّ
غنّية بصوت ملاك
بيكون شعور ما إلو معنى…
وهيك أنا بحبّك
بفرح الشمس وسفر الغيم ….
ونغمة ملاك
وإنت وحدك وحدك
ملاك عمري…
وهيك بحبّك.

*أسرارك متل السما*
#كلود_ناصيف_حرب

بالسما فوق
مطرح الما بتوصل
عيون البشر
بشوفك إنت
كوكب من نور
مش متل الناس
مش متل حدا…
أحلى من القمر
أعلى من المجرات
أعظم من الكلمه
أيّا ورده بتلبقلك
وقلبك جنينه
وروحك ربيع النرجس والياسمين؟
لو بتعرف
قدّيش عندي حنين
بوقف عالغيمه وحْدي
تا إلمس نور عيونك
وما حدا غيري
بيعرف أسرارك
أسرارك متل السما
وبشوف حالي
لأنّو ما حدا غيري
بيدخل عا قلبك
قلبك وقلبي
وعد مكتوب عا لوح الخلود
وإنت الخلود بروحي.

*بنت زغيره*
#كلود_ناصيف_حرب

كان في بنت زغيره
بتلبس حرير النطره
وبتشوف بالمرايه
خيّال جايي من بلاد بعيده
ويشلح ورده عا شعرها الطويل…
كبرو اللي بيحبّو
وصارت الحكايه شجره
وصار القمر أكبر
فوق الحور الأخضر
وضحكة عينيها
جنينة أحلام
وكحلتها السودا حبر القلام.
ويا هالمزهريه
ضلي ابعتيلو نسمة عطر بتخبّر عنها
والعبير ما بيحكي
بس بيكتب عا ورق الزمان
كلمة حب للأميرة الحلوه…
وبيسهر الليل
حدّ عيونها الحلوين.

*لا تخف من السفر*
#كلود_ناصيف_حرب
هكذا اسكبْ العطر
واكتبْ شعراً وحكايات
ولا تخف من السفر
لأنّ الحبّ اقوى من العتمة
وأدفأ من النار
وأسرع من الريح ..
الحب هو دموع الشجر ..
وخيط الامل ..

عند الفجر يبزغ الضوء
ويكون بصيص الرجاء
آتياً من سفر الليل
من أماكن خفية
ويخلع الليل ثياباً سوداء

كغبار الأحزان
كلّ شيء سيكون جميلاً
والمياه ستروي الارض اليابسة
وستعطي الحياة..
لو لم تكن دمعة
لما كانت من القلب ابتسامة..
لا تخف،
فدموعك غالية
والنور لن ينطفئ
فاتبع الطريق
والصور التي تطير في الهواء
ستختبئ في قصيدة.

*حقيقتك في قلبي*
#كلود_ناصيف_حرب
لو غاب القمر
فنورُك لا يغيب من عينيّ…

والشمس لو غربتْ
فلا غروب لحقيقتك
في قلبي…

النجوم التي تلتمع
كل ضوء منها يكتب حرفاً من حبّي لك…

وورود العالم كلها لا تكفي
لتكون هديّه منّي إليك

البحر بمدّه وجزره
هو حضورك وغيابك

كم حاولتُ أن أنساك
وللنسيان
صوت وصدى منك…

الربيع يختفي عندما تغيب
والأرض تدور إلى نقطة نلتقي فيها معاً…
وسنبقى معاً.

رائحة عطرك تملأ زماني ومكاني وأحلامي…
وتتسلّل إلى فضاء غرفتي من المدى الأبعد…

أحبّكَ في يقظتى ومنامي
وأحلامي التي تعانقني فيها أكبر من الليل… ومن النهار
وأكبر من وجودي…

كل الدفاتر لا تتّسع لمشاعري
لذلك أبدو حزينة…

أنا لم أعد امرأة عاديّة
أصبحتُ السماء والعطر والوردة وخيالي زورق
يبحر إلى البعيد…
ولا يرسو على مرفأ
عندما يسافر إليك.

*هاللفته من عيوني*
#كلود_ناصيف_حرب
هاللفته من عيوني
شو بتعنيلك؟
بعرف ناطرها من زمان
وناطرني تا قول كلمه
والكلمه بتغير عالم.
عم تتعذب كرمالي
والموعد صعب
قولك رح شوفك غير بالأحلام؟
وشو فيها لو مرّه بالعمر
سمعتْ قلبك شو بيحكي
وسافرت بعيونك
ورا الأسرار؟
لازم خزق تياب السكت
وإلبس الشتي
وروح لعندك
خبّط عالبواب…
هونيك مطرح الإنت ساكن
بلاقي نفسي…
وحبر عيوني بيكتب عالحيطان:
هون التقيت بحبيبي
وهون فتّح الورد
وغنى الطير الحزين
وضوّا نور عيوني
ليل العاشقين.

*أكتب بالعطر*
#كلود_ناصيف_حرب
أسأل الحارس عنك…
أخشى أن يأخذك الشتاء مني…
أن تدوب ضحكتك
في الماء…
لا أحد يعرف أسرار ابتسامتك
إلا أنا…
هذه الابتسامة عالمي…
اطمئناني…
شعوري بأنّ كل شيء
على ما يرام…
سأعلن للشتاء أنّك حبيبي…
فمن يخلصني من غضبي
إلاّ حكمتك؟
من يعيدني إلى ذاتي
إلا صوتك الرقيق؟
اذهب يا شتاء
واقترب يا عطر الياسمين
أنا أكتب بالعطر …
بالعطر وحده كلمة “حبيبي”.

*على جسر المدينة*
#كلود_ناصيف_حرب
انتظرتك على جسر المدينة…
نهرني الحارس وقال:
ألا تعرفين
أنّ الحبّ ممنوع؟
قلت له:
قدري أن أحبّ…
وسيأتي حبيبي
ليعانقني بعد غياب
وسنطير من حبّنا…
ويطير بنا الجسر.

* بحبّك يا هالصوره*
#كلود_ناصيف_حرب
بحبّك يا هالصوره…
قدّيش سكوتك بيحكي
وبيخبرني أسرار
عن حبيبي!
كل يوم بزورك
بتطلّع فيكي
تا أعرف شو عم بيقول؟
بيحبّني؟
أكيد بيحبّني…
هوّي اللي اشترالي
فستان العيد…
هوّي اللي عطاني
كمشة مواعيد.
روح يا خريف
وتعي يا وردة
واكبري واكبري…
أنا لحبيبي وديت عطر الدار
وجوقة أطيار
تا يغنو حد شباكو:
بحبَّك أنا بحبّك…
إنت خلقت
يوم اللي أنا خلقت….
وكان مكتوب إتلاقى فيك…
ما همني قبل وبعد
إنت الكنت
ورح تكون أمير العاشقين
يا عمري اللي كلو حنين
والسنين ما فيها تمحي قصتنا…
ولا الشتي الحزين.

الإِعلامِيَّة وَالأَدِيبَة المَهجَريَّةَ
#كلُود_نَاصِيف_حَرب،