النائب السابق غنوة جلول: الأسبوع القادم هو أهم أسبوع رح يمر علينا بأزمة كورونا
الشمال نيوز – عامر الشعار
وجهت النائب السابق الدكتورة غنوة جلول رسالة جاء فيها:
إلى أهلنا وأحبّائنا جميعاً
مواكبة منّا لحماية شعبنا من إنتشار وباء فيروس الكورونا منتمنّى على الجميع التنبّه لهذا الموضوع :
الأسبوع القادم هو أهم أسبوع رح يمر علينا بأزمة كورونا الحالية
كل الدول اللي سبقتنا الفيروس انتشر فيها بالأسبوع الثالث،
و خرج عن السيطرة بالأسبوع الرابع ،
منشان هيك الأسبوع الثالث هو الاختبار الحقيقي و اللي رح يصير سيناريو واحد من إثنين :
*السيناريو الأول* : الناس رح تضل مستهينة بالموضوع و رح يضلو عم يقنعوا حالهن إنو الموضوع بعيد و هو عند الناس التانيين، و رح يستمروا بالإهمال والتعامل مع الموضوع على إنو حرب أعصاب،
و إنو هنّي أفهم من كل اللي حواليهم .
هيدا السيناريو رح يكون معناتو إنو اللي رح ينصاب رح يعدي كل أهل بيته و جيرانه و حتى اللي أخد احتياطاته رح تصير معركته أصعب و حمايته شبه مستحيلة .
وهيدا هو نفس السيناريو اللي صار بايطاليا، الناس أخدت اجازات و نزلت عالمولات و عملوا تجمعات
وحالياً عم يتم إختيار الناس اللي رح تاخد مكان على أجهزة التنفس الإصطناعي بالقرعة و الباقي هو و حظه.
*السيناريو الثاني* : إنو الناس تفهم خطورة الموقف ،و اللي بيعرف يقول للّي مابيعرف و اللي فهمان الوضع يقول للإنسان الغير مدرك للوضع ،و اللي عنده سلطة ينفذها و يجبر الناس اللي بيقدر عليهن إنو يلتزموا.
هيدا السيناريو هو سيناريو الوعي وهيدا نفس السيناريو إللي تطبّق بالصين الدولة المصدّرة للفيروس . نفس السيناريو اللي خلّا مقاطعة ووهان اللي كانت هي المنبع تحتفل إنها خالية من الفيروس .
الموضوع حسبته بسيطة
الفايروس مدة إحتضانه ١٤ يوم .. لو سيطرنا على أنفسنا كمجتمع ٣ أسابيع الأزمة بتخلص لأنو إذا الجميع إلتزم المصاب مارح يلاقي حدا يعديه و بإذن الله بيتعافى.
و اللي مهتم ومحافظ على حاله بتصير مهمته أسهل لأنو كل اللي حواليه فهمانين ومتعاونين .
دورك هلأ إنك تختار السيناريو المناسب إلك . لو عندك أي سلطة أو صوتك مسموع وصّل صوتك و خللي إللي حواليك يعرفوا إنو هالمعركة محتاجة كل شخص.
بعتها لكل إللي عندك و فهمهن إنو مافي شي إسمو ناس إي وناس لأ بهالمعركة تحديدا .
وإذا عندك حدا مش مقتنع إنّو الموضوع مؤامرة أو إنو بعيد عنّا فهّمو إنو هالكلام منّو حقيقي وإنو موقفه السلبي ممكن يتسبب بعدوى لأولاده واهل بيته أو جيرانه او رفقاته بالشغل .
نحنا هلأ بنفس الإختبار اللي إنحطت فيه كل الدول اللي قبلنا و مع إنو هوّي نفس الفيروس ، لكن كل دولة صار فيها قصة مختلفة على حسب ردة فعل شعبها ، و هل فهموا بعض و وقفوا مع بعض و قاوموا الجهل و قاوموا الإهمال . الحكومة عملت كل اللي بتقدر عليه بس مارح يقدروا يتابعونا ببيوتنا ، لازم كل واحد يكون مسؤول عن حاله وعن اللي حواليه.
ضلّو متذكرين إنو
في دولة إحتفلت بانتهاء الفيروس من مجموعة من محافظاتها
وفي دول قالت لشعبها ودّعوا إللي بتحبوهن.
ما في شي ما إلو نهاية
إحموا حالكم
#خليكم_بالبيت
