المهندس الاستشاري رضوان علم الدين يوجه رساله صارخة إلى وزيرة الطاقة والكهرباء

الشمال نيوز – عامر الشعار

♦رساله الى معالي وزيرة الطاقة والكهرباء….
تحية طيبة وبعد….
الف تحية والف سلام من المنية اللبنانية ..منية العروبة الصادقة …
نعم المنية ليست مصطاف جبلي وليست على جدول المشاريع السياحية اللبنانية…
بس المنية فيها جميع مكونات الجغرافية اللبنانية فيها البحر والساحل والسهل والوادي والجبل والخضار والنهر والساقية ..والاجمل منهم كلهم فيها شعب شريف مخلص لوطنه لبنان كل لبنان ١٠٤٥٢ كلم م٢… فيها المزارع الناجح والصناعي الناجح والتاجر الناجح وفيها نسبة مثقفين ومتعلمين جامعيين من اكبر نسبة بلبنان بجميع قطاع الجامعيين وفيها مدرسين بيعلموا بكل المناطق اللبنانية وفيها جنود ابطال شاركوا بجميع معارك الجيش اللبناني وضحوا بدمهم على جميع الاراضي اللبناني …وفيها شهداء بعدهم على ارض فلسطين وفيها اول اسير عربي لا تزال تطالب برجوعه بطل العرب يحيا سكاف…وفيها مغترين هاجروا وحافظوا على منيتهم في الاغتراب بنوا المنية دون مساعدة الدولة…..
و يا وزيرة الوطن اذا حابي تشمي ريحة النفايات عنا زهر الليمون معطر لا كل شمال لبنان والكهربا نحنا بحاجي الها لا مصانعنا ولا تدريس اولادنا وتطويرها الحمد الله القمر والشمس دائما بيزيدوا المنية نور على نور….
وبدي خبرك خبرية يا وزيرة الوطن . المنية مدينة الانبياء ( النبي يوشع والنبي كزيبر وبرج اليهودية وفيها أقدم الكنائس واقدم المساجد )..نحنا عنا الجامع جنب الكنيسة …منعيد مع المسيحيين والمسيحيين بيوقفوا معنا بالعزاء صف واحد…واسماء اولادنا مشتركة معهم ….بعد كل هالشي واسا في كتير من المعلومات في كتب ومراجع فيكي تسالي عنهم أهل التاريخ …يا وزيرة الوطن اذا حابي تتعلمي الوطنية عنا مدارس اساتذتها اغلبهم مسحيين علمونا اكتر ما تعلمتي بكتير بكتير….
المنية جنة لبنان والمنية والجوار اكبر من منطقتك واكبر من نسبة اراضي بجغرافية لبنان….والاصطياف ما بحدد تقسيم الكهرباء….بس نحنا حقنا الشرعي كهرباء ٢٤/ ٢٤ …لانوا رضينا نحط مصنع مسرطن على ارض الاجداد لا خدمة الوطن مقابل ناخد كهرباء نستقبل مغتربينا بفصل الصيف وهولي بتعرفي اهم بكتير من السواح والمصطافين . نعلم ونشتغل ومتحملين كل امراض السرطان ، والله يرحم اللي ماتوا اكبر نسبة سرطان على صعيد لبنان والحمد الله لا مساعدات من الدولة ومندفع مستشفايات وادوية ونحنا ساكتين …وكهربتك منها عادلة يا وزيرة الوطن …اذا بتصنفينا بكل التصانيف المشبوهة…..بس رح خبرك شي…المنية لها الله يحميها….وعند الشدائد نحنا كلنا ايد وحدة لا تفرقنا السياسة ولا التبعية نجتمع على كلمة الحق جميعا اسلام ومسيحية فقير وغني عامل ومتعلم واستاز وتلميذ خوري وشيخ وحفنا مناخدوا ومنحافظ على حق غيرنابكل آحترام ….وكلمة اخيرة المنية اكبر بكتير من وزارتك ..اسألي اللي ربوكي شو بتكون المنية ساعتها المنية رح تكون المنية بلد الاصطياف الاول لجميع اللبنانيين ..ومن حقنا كل خدمات الدولة طالما نحنا ملتزمين بالقانون والضرائب وحماية الوطن كل الوطن….واذا كنت تصنفين من النساء الناجاحات رح خبرك انوا نساء المنية ناجحات بالمنية مثل الرجال…بشتى الميادين …التربية العلمية الجامعية ومنهم واصلين بشهادات جامعية اكتر من شهاداتك ما بس بيعملوا وزارة بيعلموكي اصول الستراتيجيات والتطوير والتحديث .والمنية وزيرها دولة الرئيس الشيخ سعد الحريري رئيسك يعني المنية لها جميع وزراء لبنان ..يا ريت تزوري المنية على قمة جبل العلم و المعرفة ساعتها بتحكمي وبتعطي رأيك بالمنية وتصنفيها …..وبدي خبرك شغلي مهمة كتير تحفظيها كلما تسمعي اسم المنية …هيدي اسمها المنية مدينة الشهيد رفيق الحريري….ابو لا دولة رئيسك دولة الرئيس الشيخ سعد الحريري…فيكي تسالي بالجلسة القادمة ليش سموا المنية مدينة الشهيد رفيق الحريري لانها تسير وتبنى على خطى وافكار روحه بمحبة الوطن والعيش المشترك والعلم والمعرفة…..المنية اكبر من تعرفيها انت المنية بلد اصطياف ومحبة ورجولة …شعارها على مدخلها الاول …احترام الجيش اللبناني….شرف تضحية وفاء واكثر مدينة قدمت شهداء في معارك الارهاب والوطنية …
.اتمنى ان تصلك رسالتي يا معالي وزيرة الوطن …يا وزيرة كهرباء المسرطن لمنيتنا …حقوق المنية سنأخذها مهما كان ….ولا تشوهي سمعتنا لانك تشوهي سمعة وزارتك في الوطن والوطن اكبر منك ومن الجميع….وبحب توصلي رسالة لزميلك وزير البيئة بيكفينا سرطان الكهرباء ما بدنا سرطان مطامر ومحارق…الله يطرح له البركة يحطهم بمدينتوا يجربهم عندوا اولا والمنية جنة زرعها الاجداد بأجمل انواع الاشجار التاريخية وهلق كلها عما تموت بسبب مطمر عدوي والتلوث الكبير اللي تحملتوا منيتنا ….حملنا ١٤ سنة زبالة الشمال بكفي
…واذا بتحبي الحوار …يا ريت حتى تتعرفي اكثر واكثر عن المنية وأجمل مدينة اصطياف ….بس قبل كل شي اتمنى منك الاعتذار من اهل المنية وهيدا واجب وطني، امام رئيس دولة الوزراء رئيسك وجميع وزراء لبنان ورئيس الجمهورية ابو الكل على الهواء مباشرة…
وشكرا يا وزيرة الوطن…
مع خالص تحياتي
المهندس رضوان علم الدين