سوزان …!!

الشمال نيوز  – عامر الشعار

👑🏆 سوزان 🪗🪉

✍️الشاعر نبيل ويزاني العاملي
سوزان
مش قالوا سنة؟
لا…
هيدي غلطة بالتقويم.
الوقت كان نايم
وصحِي
نهار قالت سوزان «آه».
سوزان مش عمر،
سوزان ميزان الضوء،
إذا ضحكت
بيميل النهار عالفرح،
وإذا غمّضت عيونها
الليل بيتعلّم الحنية.
حفيدة؟
لا…
هيدي ذريعة الخلق
ليعيد اختراع الحب
بنسخة أنقى.
جاد…
عيونو خضرا
مش لون حشيش،
لون وعد،
كأنو عايش
بس ليضلّ هاللون
مفتوح
بقلب سوزان.
واقف حدّها
مش كأب،
كحارس نبع،
بيفهم إنو الحياة
صارت تبريرها الوحيد
رمشة من بنتو.
ورها…
آه يا رها…
اسمك سبب.
لأنًّك إنتِ إنتِ
صارت سوزان حَجِّة،
ولأنَّك إنتِ
صارت الأمومة
تلبس تاج ذكاء
وتقعد بهدوء
على جبين طفلة.
سوزان
مش بنت سنة،
سوزان بداية.
مش أميرة لأنو حلوة،
أميرة لأنو الوعي
اختارك طفلته.
إذا بدُّن يقيسوا العُمر
خلِّيهُن يقيسوه
بعدد المرات
اللي القلب
بيركع فيها
قدّام ضحكتها.
سوزان هي التقويم،
وأنا…
جدّ
تعلّم متأخّر
إنو الحُبّْ
لما بيجي هيك
ما بْيِنكتب
بينحسب صلاة.
جدُّو❤️نبيل علي ويزاني
طرابلس 22.12.2025