البعريني: الحل مش بإقرار موازنة .. الحل نقتنع انه سياسة النكايات والخصومات وتكسير الروس ما بتبني بلد

الشمال نيوز – عامر الشعار

البعريني: “الحل مش بإقرار موازنة .. الحل نقتنع انه سياسة النكايات والخصومات وتكسير الروس ما بتبني بلد”

قال النائب وليد البعريني في كلمته خلال جلسة مجلس النواب اليوم، “نعلم بأن الأرقام المكتوبة في الموازنة لا يُمكن أن تُصرف بالواقع، وبأن العديد من اللبنانيين في بيوتهم الذين يستمعون للجلسة يعلمون بأن ما يحصل نوع من أنواع “رفع العتب”، لأن السنة أصبحت على الآخر والموازنة متأخرة شهور طويلة.. وأساسًا لو اقريناها شو رح يتغير؟”.

وتابع متسائلاً :”اذا اقرّينا الموزانة، رح تجي الكهربا؟ رح يصير المريض يلاقي دوا؟ رح تتيسّر علاجات الامراض المستعصية؟ رح يتأمّن حليب أطفال بسعر معقول؟ رح نضمن ربطة الخبز ما يغلا سعرها؟ رح يطمن بالوا ابن الجرد انو قادر يدفا بالشتوية؟ بتحدا وزير يوقف ويقلي اي رح تنحل وحدة من هالمواضيع!”

وأضاف مؤكدًا: “بالنهاية، هذا همّ الناس الأساسي، وهنا أتحدث عن عكار، واعتقد بأن هذا الكلام بينطبق على كل لبنان، فللأسف شوفوا وين صرنا، شوفوا اديش رجعنا لورا واديش صارت طموحات شعبنا متواضعة: خبز وتدفئة ودوا!”

وتابع: “اذا اقرت الموازنة رح يفوتو الطلاب على المدارس والجامعات؟ رح ترجع دوائر الدولة تفتح ليخلصوا الناس معاملاتهم.. رح تخلص الاضرابات بالقضاء وبالقطاع العام والمجال التربوي؟ أو رح نقرّ الموازنة من هون، وكل الباقي يبقى متل ما هوي، والكوارث تزيد والانهيار يستمر والناس تبقى عم تعاني!”

وأضاف مؤكدًا: “رح نبقى محلنا، لأن الأمور مش مرتبطة بأرقام عم نحطا بس الدولة مش قادرة تصرف منها شي! فكيف منقر موازنة بالليرة اللبنانية ومش عارفين قيمة الليرة اديش فعليًا… ويمكن من لما بلشت كلمتي لهلق تكون طلعت او نزلت شي 1500!”

وأردف: “نحن بمأزق كتار من المسؤولين يتغاضون عنه، وكتار همهم حالهم وبس، مصالحهم وبس! فالحل مش بإقرار موازنة رغم اني بعرف انو هالشي واجب دستوري، وللأسف ما حدا محترم مهلته، الحل نقتنع انه سياسة النكايات والخصومات وتكسير الروس ما بتبني بلد! الحل نوعا انه بتصفية الحسابات يلي سعى لها البعض، تصفّى الشعب اللبناني كله، الحل نرجع للعقل والمنطق، نفهم انه بهالبلد ما حدا في يلغي حدا ولا حدا في يتجاوز حدا… وكلنا نتفاهم على هالقاعدة، نتفاهم على حل مش على تحاصص، على مشاريع مش على مكاسب، فبالجو يلي مسيطر مش قادرين نكمل، حتى عمليًا نحن كنواب مش قادرين نطالب بمشاريع أو نتابع ملف ونوصل لنتيجة، لان غالبية المسؤولين متنصلين من المسؤولية، وكل واحد بكبها على التاني!
وبالنهاية، الضحية واحدة، وهني الناس يلي شو ما قالوا معهم حق، وشو ما حكيو قليل نسبة لوجعهم!”

وختم : “الموازنة رح تنقر، بس مش هيدا الاساس، ولهذا مطلبنا من كل مسؤول يفكر بالناس ويتشغل لحل سريع، والا كلنا خسرانين وما بعود ينفع الندم”