العمري: كرمال العيون اللي زحفوا ع بواب مجلس النواب
روح انتخب

الشمال نيوز – عامر الشعار

كرمال العيون اللي زحفوا ع بواب مجلس النواب،
روح انتخب…

كرمال ولاد شهداء١٧ تشرين، ما حدا يقول لهم “بيّكم راح ضيعان”،
روح انتخب…

كرمال أطفال ٤ آب،
والأطفال اللي هربانين من “جهنم”، ع وجه المي، لأن العصابة كتبت مصيرهم “يا حريق، يا غريق”،
روح انتخب…

كرمال السنتين ونص قهر، جربنا فيهم كتير، وما قدرنا نرد حقنا، لهلأ،
روح انتخب…

كرمال ولادك اللي انجبروا يكبروا بكير، يعتلوا هم ويحسبوا معنك بكير،
روح نزل وحط ورقة،
بعرف انها يمكن ما تكفي،
بس لما بعدين يسألونا ولادنا “طب شو عملتوا انتوا؟”،
نخبرهم انو جربنا كل شي، لحد ١٥ أيار، بدون ما نضطر نخبي عيونا من عيونهم…

أنا من اللي قرفوا من كل الأغلاط والأنانية والعناد اللي خلت صوت الناس يخف ويضعف يوم عن يوم ووصلتهم للانتخابات مشرذمين،
بس بعرف انو هالأخطاء سببها مشاكل نفسية واجتماعية مغلغلة ببلدنا وموجودة بأغلب الناس،
وبعرف كمان،
انو الاوادم بهالبلد دايماً مترددين وراخيينها ويللي بدكم،
بوقت بتبقى العصابات موحدة وصلبة، بيجمعها الشر والطمع وجنون السلطة والخوف من الناس…

كرمال هيك روح انزل،
حط على عين كل اللي مراهنين من اول يوم انو شو ما عملوا، ما حدا رح يحاسبهم،
لأن بإيدهم العصا والمال وكتير من الاعلام،
وفيهم يضلوا يخنقوا الناس بالجهل والخوف واليأس وقلة المروة، “سرطان” الشعب العنيد…

يللي بدو يقعد ببيته ب ١٥ أيار، ما بقى ينق ٤ سنين بعدها، لانه حر،وهو جنا على نفسه..وعلى ولاده….

ويللي بدو يوقف بوج كل مين دق بكرامته ومستقبل ولاده وأكله وشربه وصحته ومصرياته، وحرمه الدواء والكهرباء والماي والبنزين والغاز وربطة الخبز،
بعد عندك ١٥ أيار،
للي بدو ينتقم من للي كان سبب بقتل اهلنا وولادنا بقارب الموت
بعد عندك. 15 أيار…
فرصة يمكن ما تتكرر لبعد أربع سنين،
أو أكتر…
للي بدو يحاسب الفاسدين والسارقين للي سرقوا اموالنا …
بعد عندك 15 ايار..
انزل انزل انزل انتخب الصح….
وانتخب للي بدو التغيير ولا تنتخب الطبقة السياسية القديمة وحلفائهم….
كرمال الله انزل انتخب …..

“منقول من صديق مع بعض التعديل والاضافة”