المهندس علي أسعد يعلن ترشحه من حرار : أنا من طلاب الرئيس الشهيد رفيق الحريري وحرمان عكار همنا

الشمال نيوز – عامر الشعار

بدعوة من المرشح للمقعد النيابي السني في عكار المهندس علي أحمد أسعد، اقيم في قاعة ليالي عكار في حرار مهرجان إنتخابي اعلن خلاله عن ترشحه للمقعد النيابي ، وذلك في حضور رؤساء بلديات وأعضاء مجالس بلدية ومخاتير وحشد من أبناء قرى وبلدات جرد القيطع وعكار وأبناء بلدة حرار وهيئات المجتمع المدني وناشطين غضت بهم القاعة ..

بعد النشيد الوطني والوقوف دقيقة صمت عن روح الرئيس الشهيد رفيق الحريري ورفاقه وشهداء الجيش اللبناني والقوى الأمنية ، وكلمة ترحيب للآنسة دارين محرز ..

تحدث المرشح المهندس علي أسعد الذي حيا أهله ومحبيه وأكد انه من طلاب الرئيس الشهيد رفيق الحريري .. وقال في كلمته ..

سمعت الكثير من الكلام في هذين اليومين عن ترشحي ببيروت وغيره من الكلام الذي لا يستحق التوقف عنده ولا التعليق عليه.
هذا الكلام صادر عن نوعين من الناس : المحبون  الذي أوجه لهم  تحية و أحييهم  ومن المصطادين بالماء العكر . فالمصطادين بالماء العكر كثر .
نحن أعلنا الترشيح من بيروت فقط لأجل الصحافة والاعلام بمؤتمر صغير لا اكثر ولا اقل .
لهؤلاء نقول نحن اولاد عكار نحن اولاد الشمال , نحن يلي نبضنا عكاري , نحن يلي بيدوس على طرفنا مندوس على قلبه . رجاء” ما حدا يزايد علينا .
نحن من مدرسة الشهيد رفيق الحريري .
نحن من رحم يلي علّم , وبنى , وعمّر .
نحن يلي دفعنا وعم ندفع و عم ندافع يوم بعد يوم عن قناعاتنا وسلوكنا ومنهجنا الثابت .
يلي موجودين على الساحة السياسية اليوم خلينا نقول متل ما هي او زي ما هي :
من ايمتى ظهروا و وين كانوا حتى ينظّروا  ويحكوا   ويطمنوا العالم .
قاعدين بالابراج العاجية وعم يحكوا عن وجع وحرمان المواطن اللبناني عموما” و العكاري خصوصا”.
لهؤلاء أقول لهم أنزلوا من عليائكم وتكبركم , البسوا ثوب المواطن وعيشوا وجعوا , وبعدين خبروني عن الهم والحرمان.
كيف بدكم تحكوا عن الهم والحرمان وانتو مش عارفين شو في بعكار .
اساسا” يعني مطار القليعات يلي صرنا نسمع السياسيين وغيرهم من سنين لليوم بيحكوا عن مطار القليعات . عجيب والله ما بيخطر على بالهم مطار القليعات الا يوم الانتخابات.
وبس تخلص الانتخابات بينسوا مطار القليعات وبيرجعوا يتحصنوا بابراجهم.
لا يا حبيب هيدي النغمة خلصنا منها .
مطار القليعات يلي في يكون اهم مركز اقتصادي بعكار قادر يوظف الالاف من العكاريين وغيرهم .
ولكن شو هي السياسة يلي مانعة هالموضوع يعني عم اتساءل صراحة” .
مرة بقولولنا مشاكل تقنية ومرة بقولولنا لازم الطيران يمرق فوق سوريا ولازم اجراءات معينة وكلام فارغ من هيدا النوع
كأنه ما شاء الله النظام اللبناني ما بيتعاون مع الحكومة السورية الا بس بعكار .
بعتقد الموضوع هو حرماننا من منفذ جوي كي  نظل مهمشيين ومبهدلين على الطرقات من عكار الى بيروت .
لا كلية هندسة نملك , ولا كلية طب نملك , هالكليتان من اهم ما يحتاجه ابناؤنا في عكار .
يعني لازم المواطن العكاري يضل مزارع او فلاح او بيشتغل بالمطاعم والفنادق او بالمؤسسات الامنية. مع احترامي لهذه الوظائف . بعد في اكتر من هيك حرمان .
لا يكون المواطن العكاري اقل من غيره من الناس ونحن مش عارفين ؟
هيدي الامور ما بقى نسكت عنا .
حتى المؤسسات التعليمية البسيطة يلي موجودة عنا ما عندا سكن للطلاب . يعني يلي قادرين يتعلموا بالاماكن القليلة جدا” ما عندن مسكن يقصدوه تا يكملوا علمهم للاسف مضطرين يضلوا متشردين على الطرقات يروحوا ويجوا والحرمان والبهدلة ملازمة لنا من الولادة حتى الموت .

شاطئ العبدة للعريضة ما بشوف فيه الا الاهمال والاوساخ .
وخليني قولها زي ما هي : وزبالة السياسيين الي عم تنكب على شاطئنا .
شاطئ العبدة للعريضة لازم يكون  أكبر واجهة بحرية موجودة في لبنان والوطن العربي . ولكن عكار متل العادي لازم ضل محرومة وضل متل ما هي .
مستشفى تخصصي لا نملك , اذا الواحد مرض او صار باه شي او اي مشكلة مستعصية لا يستطيع العلاج .
ما بننسى الطفلة الي عمرها 3 أشهر المرة الماضية يلي اضطروا اهلها يروحوا مسافة 200 كيلو متر كي يوصلوها على الشوف على المؤسسة الدرزية الصحية لا يحطوا ابنتهم بالعناية ويتشنططو اهلها على الطرقات ويتركوا الطفلة لا حالها لأنن مش قادرين يضلوا معا ويروحوا ويجوا كل يوم على الطرقات ليطمئنوا على ابنتهم .
يا عيبشوم عليكم.
من مفرق المحمرة مرورا” ببنين حتى مشمش فنيدق القموعة وغيرها من الضيع ما منمشي الا بالجور ما شفنا الزفت الا الزفت الانتخابي ليش ؟
ليش بدها طرقاتنا تبقى مكسرة ومحصورة والحرمان لاحقنا من ميل لا ميل .
ليش ما بعرف ليش ؟

كمان منطقة الجومة والدريب والسهل وكل المناطق العكارية الموجودة عنّا , ما منشوفها الا مبهدلة وطرقاتها مكسرة منمشي بالجور اكتر ما نمشي على الزفت .
سهل عكار عنا أراضي شاسعة , سهل عكار قادرين نعمل افضل المزروعات وافضل الانتاج بالتوجه الصحيح .
ليش ما بيكون في عنا معمل للتعليب ولارشاد المزارعين .
قادرين نعمل كتير , انا بقدم ارض مجاني اذا كان الموضوع مستشفى او معمل او صرح جامعي .
ما حدا يقلي مش قادرين نغيّر.
نحن قوة كتير كبيرة ونحن يلي فينا نغيّر , نحن 17 % من سكان لبنان , نحن مليون نسمة واكتر , نحن ما يزيد عن 300 الف ناخب . شو ناطرين ؟
ما حدا رح يجي يطعميكون سمك ولا حدا رح يعلمكم صيد السمك . ما رح يعملوا شي غير الوعود الكاذبة .
انا من اليوم يلي اترشحت فيه لليوم ما بسمع الا كلمة شو رح تغير.
متلك متل غيرك كل الي اجوا غيرك هني نفس الشي .
لا يا حبيب هيدي الشغلة بدنا نشيلها من راسنا لأنو كل الي اجوا قبلي كانت شعاراتهم رنانة.
اما انا اليوم , طالع من رحم ابناء عكار , ثوبي من ثوبهم , لغتي لغتهم , انا الموجوع مثلهم , انا المحروم مثلهم , انا و اياكم إيد بإيد منغير  , إيد لا وحدا ما بتصفق لكن إيد بإيد منقدر نغير كتير .
نحن واياكم بدنا نفرض معادلة جديدة عالوطن .
بس يقولوا عكار بدن يرفعوا راسن .
اكتر من هيك ما عنا .
بطلع على ارز القموعة يلي هي اكبر جنة موجودة على وجه الارض في لبنان .
اذا عندكم ارز الرّب . نحن الرّب اقرب الينا في القموعة .
ليش ما عم نستثمر ليش ما عنا اكتفاء ذاتي متل ما حكينا من مطار القليعات لا جرود القموعة . عنا مناطق سياحية وعنا مناطق زراعية ممكن نكون اكبر مثال للبنان والوطن العربي وعنا قدرات فكرية وعلمية هائلة .
بس كل واحد وصل عالكرسي بينسى شو في وراه وشو تارك وراه .

انا اليوم دعوتكم مش دعوة لمؤتمر تجييش ولا  الى مؤتمر انتخابي . دعوتكم لا أحكي وجعكم  لأنو ما حدا بيعرف بالوجع الا صاحبو وما حدا بيعرف بالحرمان الا صاحبو .
ما حدا بقى يبيعنا حكي .
ما حدا بقى يبيعنا شعارات انتخابية , وانت مع مين لا انتخبك وانت بأي لائحة لا انتخبك .
انا مع رب العالمين وانا من مدرسة الشهيد رفيق الحريري .
و انا منكم و انا ابن عكار و انا واياكم بدنا نكون صوت واحد.
اذا انا وصلت على المجلس النيابي يعني وصل معي مليون عكاري على المجلس النيابي .
اذا انا وصلت على المجلس يعني كل اهل عكار وصل على المجلس النيابي .
حرمان عكار كلمة ما بقى بدي اسمعا بحياتنا . الحرمان ما بقى نسمعوا , كلمة حرمان بدي امسحها من القاموس .
بدنا نبلش نقول نهوض عكار , الحرمان ممنوع  , خلصنا من الشعارات , خلصنا من الحكي الفاضي , في عنا مشروع بدنا نقوم في نحن واياكون .
ايدي بإيدكون للتغيير , ايدي بإيديكون لا نصلّح الي خربوا السياسيين و خربوا الزمن على اهل عكار .
انا علي احمد اسعد ابن حرار عكار ابن هذه الارض انا آكل من هذا التراب , ممرمطة ايدي بترابو , انا الي راكض بسهل عكار انا الي طالع و نايم تحت ارز عكار .
انا واياكم صرنا سنين بهيدا الوضع المؤلم.
انا المرشح للانتخابات النيابية وصوتي وصوتكم واحد .
والسلام عليكم ورحمة الله و بركاته .