وحدك بعيوني .. للشاعرة والأدبية
كلود ناصيف حرب
الشمال نيوز – عامر الشعار
وحدك بعيوني
كلود ناصيف حرب
بيكونو المشاعر برد وشتي
وبس يطل الحلو
بيفتح الربيع بتيابي
وبيصير قلبي موسيقى.
بس غمض عيوني
وبس فتح عيوني.
بشوفك وحدك.
لأنك وحدك بعيوني
وهيك بحبك.
أجمل صباح حضورك
وأغمق ليل غيابك.
إلك كل جمال الغابات
وحدايق من عطر وحنين
ويسلمولي عيونك الغاليين.
كل ما تطلع شمس بقول:
مش معقول
إني ما حبّك.
هالبيت إلي وإلك
نظرة لبعيد
فيها حلم وانتظار.
جمال التمرد انا
وتمرد الجمال إنت.
كل شي حلو بعمري
لأحلى عمر، إنت .
المشاعر لو كانو موت
جمالك بيعطيهم حياة.
إنت إنت أحلى مبارح وبكرا.
وأغلى الذكريات.
قديش صعب هالزمان
وكل زمان ما فيه نحنا
لأنو البعد كسر جوانحنا.
هالبيت إلي وإلك
بركي هالخيمه
بتكون عيد ومواعيد.
قديش حلو موعدنا
حد شباك الزهر.
والدرج ما الو سياج
وانت سياج العمر.
وعيونك بيأمروني أمر.
كيف بيوصل الطير
الورد عا شبّاكك
لهفة أشواق.
كيف بيوصل الطير
عا بلاد برّا
تا يخبرك قديش
عم إعتق
أنا وانتظاري.
متل شي كوكب عالي
بتضوي بأفكاري.
وببعتلك هالرساله
من حبر إبتسامه بتحبّها.
وعيون هربانين من الناس
وبيروحو لعندك
قبل ما توصل الورقه.
بحبّك وحدك
بكتبها عالسما الزرقا.
وهيك بحبك.
عالقمر السهران
والبحيرة المشتاقه
اسمك حبيبي
مكتوب بحبر انتظاري.
كيف ما بحبّك
يا شمس نهاري
وكل الوجود
كلمة حبيبي
وإنت أغمق أسراري.
كلود ناصيف حرب.
(ملاحظة:
جميع أعمال الإعلامية والأديبة المهجرية كلود ناصيف حرب موجودة عبر موقع الأديب د. جميل الدويهي أفكار إغترابية للأدب المهجري الراقي
شكرا جزيلا. )
