أخبار عاجلة
الرئيسية / إغتراب / يخليلي هالقمر

يخليلي هالقمر

الشمال نيوز – عامر الشعار

*يخليلي هالقمر*

#كلود_ناصيف_حرب

تبقى كل الروايات
لحنين الحكايات .
***
ربيع العمر آت…
بعد زخات مطر السنين .
***
يخليلي هالقمر
وهالروح اللي عم تحكي
من قلب الصورة،
وأسرار عم تخبر أسرار.

ونظرة غميقة
فيها أمير حلو كتير.
كل يوم بيغزلي حرير..
وبيقلي أنا بحبك
قد الكون وأكتر .
والموعد ما بيتغير.

أنا وإنتي
وحدنا عالمقعد الأخضر.
بالغابه الحلوة
اللي فيها ربينا
وعالشجر كتبنا أسامينا.
وما في زعل قادر يمحينا.
وهيك #بحبك.
***
البعيد منك قريب
وشو المشوار
غير دقة قلب
وروح بتحكي
للحب أسرار..
وهيك #بحبك .
***
ضحكتك مرسومه عالحيطان.
عالورق الأخضر.
إذا كنت قريب
أو بعيد ما في شي بتغير.
ليش البحر بيصير صحرا.
وإلا النجمه اللي متل روحك بتضوي شي يوم بتوقع وبتتكسر؟ أنا هيك #بحبك
***
الأحلى من الوردة
إنت وصوتك موسيقى الزمان.
كل شي بينتسى.
وإنت وحدك وحدك .
بتتمرد عالنسيان.
***
يسلمْلي الحلو…
عا دربي وبقلبي

وبكلّ لحظة عمر…
وحنيني إلو الموج والبحر…
وهيك بحبّو.

خلّي أحلامك بألوان…
وأنا معك
أميرة الزمان…

حبّيتْ ضحكه من سنين
من قبل ما إخلق
كانت الأرض مش موجوده…
وكنت أنا واقفه
بين العتم والنور…

هالضحكه شمس أو مرفأ حنين؟
أخدني حبيبي من إيدي
عا مدينة جديده..

فيها غناني وبيّاعين…
وبعدني أنا وهوّي
عالطرقات البعيده…

هوّي فرحي الوحيد
وأنا حبيبتو الوحيده…
وهيك #بحبّو.

كلود ناصيف حرب
سيدني أستراليا
ملاحظة جميع أعمال كلود صدرت برعاية مشروع الأديب د .جميل الدويهي أفكار اغترابية، ومنشورة على موقع أفكار أغترابية.
الإِعلامِيَّة وَالأَدِيبَة المَهجَريَّةَ
#كلُود_نَاصِيف_حَرب
_مُؤَسِّسَة “بُستَان الإِبدَاع*
_مساهمة في مشروع الأديب د. جميل ميلاد الدويهي مشروع أفكار إغترابيّة للأدب المهجري الراقي أستراليا
_عضو شرف في نقابة ممثلي المسرح والسينما والإذاعة والتلفزيون في لبنان.

عن amer shaar

شاهد أيضاً

الدكتور جميل الدويهي: هيدي حياتي (المدوّر العاميّ)

الشمال نيوز – عامر الشعار هيدي حياتي (المدوّر العاميّ) هَيدي حياتي كتبْتها ومحَّيتها، تا تسمعي …