أخبار عاجلة
الرئيسية / إغتراب / عالم الأحلام,وأحلامك أنا

عالم الأحلام,وأحلامك أنا

الشمال نيوز – عامر الشعار

*عالم الأحلام,وأحلامك أنا*

#كلود_ناصيف_حرب
إبتسامة أشواق.
شلال حنين..
زهر وشتي
هيك مشوار الدني .
***
شي يطلع الصبح،
المحك عم تبتسم عا بابي، وتقلي شو حلوين تيابي.
حرير شغل الزوق،
ما في متلو بالسوق،
ونشرب قهوتنا،
أنا وإنت وأسرارنا ،
وما حدا يعرف خبارنا،
غير عصفور زغير،
بيغنيلنا وبيطير…
وما بيترك جنينتنا.
وهيك #بحبك.
***
رح ينام القمر
بكير. تعبان
من كتر ما سرح بالليل.
وتنقوز عالشبابيك والحيطان.
تركلي خيط زغير عا شباكي.
وكتب بحبر الليل:
أنا بحبك إنتي إنتي إنتي.
ولو شي مره زعلنا…
إنتي صورة
مطبوعة بعيوني…
ولو كنتي بعيده بقشعك وين ما بتكوني.
وبحرسك بجفوني….
وهيك #بحبك.
***
كل صورة فيها حكاية إبداع
وأنت كل الحكاية.
***
إبتسامه الك.
كل عطر الورد والياسمين والحبق صباحك.
يا ضو الحبر.
يا صوت الكلمه
عا سطور الحنين.
***
أخدْني حبيبي
يسلمْلي الحلو…
عا دربي وبقلبي
وبكلّ لحظة عمر…
وحنيني إلو الموج والبحر…
وهيك بحبّو.
***
خلّي أحلامك بألوان…
وأنا معك
أميرة الزمان…
حبّيتْ ضحكه من سنين
من قبل ما إخلق
كانت الأرض مش موجوده…
وكنت أنا واقفه
بين العتم والنور…
هالضحكه
شمس أو مرفأ حنين؟
***
أخدني حبيبي من إيدي
عا مدينه جديده…
فيها غناني وبيّاعين…
وبعدني أنا وهوّي
عالطرقات البعيده…
هوّي فرحي الوحيد
وأنا حبيبتو الوحيده…
وهيك #بحبّو.
***
حد شباكك هالعصفور الملون تا يحكيلك عني.
انا اللي علمتو يغني.
وعلمتو كيف يحب.
وهلق الغابه مليانه عشاق وأغاني.
وكل غنيه بتخبر
عني وعنك أسرار.
نحنا اللي قصتنا
أغمق من البحر
وأرق من الأشعار .
وهيك #بحبك واكتر …
وحبي الك دهب غالي
لا بيعتق ولا بيتغير.
ايه…هيك #بحبك .

#كلود_ناصيف_حرب
تحيات محبة.
حديثك يشبهني.
بالقلب خليني ذكرى.

*ملاحظة جميع أعمال كلود صدرت برعاية مشروع الأديب د .جميل الدويهي أفكار اغترابية، ومنشورة على موقع أفكار إغترابية للأدب المهجري الراقي .

عن amer shaar

شاهد أيضاً

الدكتور جميل الدويهي: هيدي حياتي (المدوّر العاميّ)

الشمال نيوز – عامر الشعار هيدي حياتي (المدوّر العاميّ) هَيدي حياتي كتبْتها ومحَّيتها، تا تسمعي …