الرئيسية / إغتراب / يا ساكن بعيوني

يا ساكن بعيوني

الشمال نيوز – عامر الشعار

*يا ساكن بعيوني*

#كلود_ناصيف_حرب
***
يا ساكن بعيوني.
وما بشوفك بعيوني.
برضى بالقليل.
والنطره زمان طويل. وبتكفيني هالابتسامه الحنونه… ومعليش.. .
بالأحلام إيديك يغمروني.
***
وين الصورة؟
كل مرة بسألك ..
وبنطر منك شي صورة
متل كل مرة ..
بتعرف شو ؟
هالمرة ما عاد رح اسالك
لأنك أنت صورتي
ومرايتي وكل حكايتي ..
يمكن انطر منك شي وردة وغنية وهدية
وكمشة قصايد
بتحكي عني وعنك .
كلامك احلى صوره وابتسامتك بتكمل الصورة..
وأنا بشوفك وين ما كنت
لوحة حلوة وبشوف بعيونك صورة عيوني…
يا أغلى من عيوني.
***
شو بينكتب بعد
لعيون أغمق من الليل
وأبعد من الأفكار؟
النظره مشتاقه وما بتحكي.
عاقله ورايقه كتير.
بس بتحلم بالأمير.
والأمير مسافر.
هون وبعيد.
قمر ومش بالإيد.
يا عمر اي متى رح تجمعنا
تا يخلص وجعنا؟
بركي شي غمره زغيره. ..
بركي شي كلمه زغيره
ولاد زغار بترجعنا.
***
شو بيعرفو الناس
عني وعنك غير كمشة
أخبار وحكايات؟
يا ريت بيشوفو بعيونك
شو في كلام
لما تسرقو نجوم الليل
عا حكايتنا ضحكت الساحات وضويت الأنوار ..
***
بيني وبينك يا قمر
قصة روح…
حكاية نور
بينزل من الجبل العالي .
والاميره الحلوه بتقلك خليك هون حدي يا غالي .
صلا ورجا ببعتلك
مع نور حبي…
***
هيك قصتنا ..
صفا وعمر وطريق بياخذنا ع دروب الحنين والوفا ..
انت اكتبلي
عن فرح المواعيد
وانا بقلك
انت عندي كل العيد.
وهيك واكتر من هيك بكتير #بحبك.
***
من كم سنة خبرتك
وقلت لك يا فرح
وين بخبيك وين …
بخاف يخطفك مني القدر وتختفي مع اللي راحو بغابة النسيان ..
وصير فتش عليك
وما لاقيك واحزن كيف بدي خبرك قديش كنت
انت فرح العيد ..
رح إرجع خبيك
مطرح ما نطرنا سوا
نقطف العنب
وضجت فينا أخبار الدني ..
هونيك التقيو
عصفورين حلوين
هوي يقطف من العنب ويدوق حبه ورا حبه
وهيي تقطف من عطر غناني وتتدلل عليه وتقلو :
غنوجتك انا يا عمر جديد …
بعرف الكرم لنا
ومعك انت انت انت
حليت المواعيد.
وهيك #بحبك
***
هيدا حلم أو نهر
بيروح لعندك؟
بياخد حنيني
واشواق سنيني .
يا نغمه حب رقيقه.
ابعتلي ورود الحديقه.
اكتب لي عا كل ورده:
أنا معك
إنتي إنتي إنتي
بكون الحقيقه.
***
ببعتلك ورد المحبه
غمر ورا غمر تا قلك:
انت احلى حكاية حب.
انت فرح قلبي
يا أغلى من العمر.
***
بكتبلك عا وراق الحنين. قبل وبعد. وكل لحظه صورتك بتطلع من السطور. بتضحكلي
وبشتاق كون معك.
لازم أتعود حب هالقمر
وما أقدر طالو.
بوقف قبالو وبحكيلو عالهدا.
وبقلو انت وحدك حبيبي.
واللي بيحب هلقد لازم يبكي هوي وحالو عا حالو. وهيك #بحبك أنا.
كلود ناصيف حرب.

عن amer shaar

شاهد أيضاً

عالم الأحلام,وأحلامك أنا

الشمال نيوز – عامر الشعار *عالم الأحلام,وأحلامك أنا* #كلود_ناصيف_حرب إبتسامة أشواق. شلال حنين.. زهر وشتي …