إغتراب

من لون ضحكتك

الشمال نيوز – عامر الشعار

#كلود_ناصيف_حرب
Music. Brahms Symphony 4 in E minor. No copyright music, Wiki sounds list.
كــــلــــود نــــاصيف حرب:
*من لون ضحكتك*

صرت أعرف إنّو النور
من لون ضحكتك
وهالسما اللي متل الخيمه
بتوشوش ويتقول:
إذا ما كان الحبّ
غنّية بصوت ملاك
بيكون شعور ما إلو معنى…
وهيك أنا بحبّك
بفرح الشمس وسفر الغيم ….
ونغمة ملاك
وإنت وحدك وحدك
ملاك عمري…
وهيك بحبّك.

ممنوع النسيان…
وأنا كيف بنساك؟
بترافقني عالطريق…
بتمسك بإيدي
بتخاف عليّي
من الليل والشتي
إنت اللي عطيتني الفرح
من بعد الأحزان
إنت القصيده بكتابي
كتبتها بدموع الحنان
وعنوانها:
ممنوع النسيان.

روح يا نسيان
كيف بيهرب الوقت
من بين إيدينا؟
لا حكينا ولا حكيو عينينا
بعرف قدّيش عندك كلام
وبالصدفه ما التقينا…
قولك بهاك اللحظة شو رح بتقول؟
الكلمات رح يصيرو غابه
وأنا بغمّض عيوني
تا إسمعك أكتر…
بالعتمه بيكون الهمس أحلى…
بحبِّك أنا بحبِّك
بيصيرو الحروف موّال
ولمسة إيدك عا كتفي شال
روح يا نسيان
وتعي يا هاك الصُّدفه
تا لاقي حبيبي
ويصير كحل عيوني شِتي
واللون العا شفافي قصيده
والشمس إسوارة بإيدي.

إنت حبيبي
هالصوره اللي كلاّ حنين
وعيونها جوز سرّاقين
من نومي سرقوني
وبالريح تركوني…
ويا ريت
الغابه القريبه بتجمنا سوا
ويطير شَعري بالهوا
وما بخاف من الليل
وإنت حبيبي
عم بتلبّسني إسوارة النجمه
وتقلّي: أنا بحبّ عينيكي
أنا حارس عمرك
وما بغيب من حواليكي
ورح عمّرلك قصر بالعالي
مطرح الما بيوصلو الخيّاله
من كتر ما بغار عليكي…
وهيك بحبِّك.

حروف إسمي
بتاخدلك النسمه
حروف اسمي…
كل المواعيد
متل موج البحر بتتكسّر
إلا موعدي
مع رمش عيونك
هوّي البحر
والسما
والأرض
وأبجديّة حبّك حروف قليله
مكتوبه عا قلبي
للخلود…
وهيك بشتقلك.

أسرارك متل السما
بالسما فوق…
مطرح الما بتوصل عيون البشر
بشوفك إنت
كوكب من نور
مش متل الناس
مش متل حدا…
أحلى من القمر
أعلى من المجرات
أعظم من الكلمه
أيّا ورده بتلبقلك
وقلبك جنينه
وروحك ربيع النرجس والياسمين؟
لو بتعرف قدّيش عندي حنين
بوقف عالغيمه
وحْدي…
تا إلمس نور عيونك
وما حدا غيري بيعرف أسرارك
أسرارك متل السما…
وبشوف حالي
لأنّو ما حدا غيري بيدخل عا قلبك
قلبك وقلبي
وعد مكتوب عا لوح الخلود
وإنت الخلود بروحي.

كان في بنت زغيره
بتلبس حرير النطره
وبتشوف بالمرايه
خيّال جايي من بلاد بعيده
ويشلح ورده عا شعرها الطويل…
كبرو اللي بيحبّو
وصارت الحكايه شجره
وصار القمر أكبر
فوق الحور الأخضر
وضحكة عينيها جنينة أحلام
وكحلتها السودا حبر القلام….
ويا هالمزهريه
ضلي ابعتيلو نسمة عطر
بتخبّر عنها
والعبير ما بيحكي
بس بيكتب عا ورق الزمان
كلمة حب للأميرة الحلوه…
وبيسهر الليل
حدّ عيونها الحلوين.

طائر السلام الأبيض،
تا يغنّي عا الشجره القريبه، ويحملك مكاتيبي.
وعا كل مكتوب أزرق كلمتين زغار:
إنت حبيبي.

منتلاقى كيف؟ متل البحر والمينا …
متل الحبر والكلمه بقصيدة غزل . وصورتك مرسومه عا شالي العنابي. والناس خبرو عني اني حبيت، ونطرتك شي سنه عا باب البيت…
يا مسافر لبعيد ومش عارف شو بدي.
كتر ما فكرت فيك طلعت من أفكاري وصرت تمشي حدي. وهيك حبيتك.
#كلود_ناصيف_حرب
⚘💕❤⚘

مقالات ذات صلة

زر الذهاب إلى الأعلى